魚樂無窮：泛亞環保有權升三成
■泛亞環保現時街貨不多，股價易舞上；圖為公司主席蔣泉龍。 資料圖片
阿爺減息，港股興奮咗一秒，開市撲上24997點後即見頂。概念股升幅奀豬，內險內房進賬1%至2%，反高潮味道甚濃。市場已習慣減息降準等所謂利好消息，要A股再喪炒，相信非靠復蘇嘅經濟數據不行。A股慢牛走勢相當明顯，有貨底可續揸，短炒寧低吸勿高追。
央視前主播柴靜自製紀錄片「穹頂之下」，內容講述內地汙染問題情況，短短幾日點擊率數以億計，熱爆全國，連股市都俾呢段百多分鐘嘅片影響，中港新能源股大大棍炒上，完全將減息消息蓋過，配合兩會召開，相信鑊氣有望延續，今日乘勢推介泛亞環保（556），三個原因逐個數。
貨乾舞上話咁易
第一，業績靚。公司主要產銷環保產品及設備、承接環保建設工程、提供環保相關專業服務及製造環保建築材料，一條龍齊曬。中期成功扭虧為盈，賺三千萬人仔，新近與大國企北京東方首創合作，強勁木絲水泥板產品業務，前景一流。
第二，貨夠乾。大股東蔣泉龍揸咗72.5%，扣埋基金持股，街貨相信得一億股，食住今個浪，要舞上輕而易舉。
第三，好腳頭。唐牛去年兩度推介，分別有38%及20%升幅，如今重回起步點，用上兩次升幅中位數計，博升29%，屆時市值廿億未夠，環保股中仲係細路哥。
唐牛
https://www.facebook.com/tongcow88
唐牛
魚樂無窮 - 唐牛 舊文
