金手指：不問價追京能
■京能清潔能源主要在北京做天然氣發電，對減少空氣汙染有一定幫助。 互聯網
對上廿四小時有個大疑惑出現。上周六大陸有段一百零三分鐘長嘅片《穹頂之下》post上youku，講空氣汙染成因前後，鬧爆大陸政府、國企，到噚日點擊率聽聞超一億！拍嗰個係央視前記者叫柴靜，自費調查採訪，因覺得佢個小朋友病咗係空氣汙染所致，所以就「我不是多怕死，我只是不想這麼活」咁拍片。
段片引來好多討論，例如「敢言！好嘢！」或者「離央視先拍到呢！」但我哋香港人一睇反應係「冇乸理由可以畀妳post到上網！自費調查採訪？刪咗十年啦！」用正常邏輯，呢段片不但唔係獨立，根本就係大陸政權中最高層推。
業務集中 估值平
為乜呢？大陸已有獨立新聞分析話：「預期真正效應將在本月三日起的人大、政協兩會中得到凸顯。」即係今次要用解決空氣汙染做掩護，要人民犧牲畀錢埋單。有啲乜要埋單？對損害人類健康嘅空氣汙染，work嘅解決方法得一個，就係用甲烷即天然氣發電、發熱。習主席打瓜咗石油派後（因天然氣項目好難受賄，石油易好多），就早前能同俄羅斯簽天然氣大deal，但俄羅斯天然氣點平，都貴過大陸煤好多，故就要整個《穹頂之下》引起民怨，跟住順應民意堅決落實天然氣發電，加電費。
但搞環保要有真正支持，啲人命要夠值錢先得，若唔係明年都餓死，講乜十年後肺癌？考慮所有因素後孫柏文揀到一間公司，為確定噚日問梁心欣：「環保概念通地都係，有冇啲淨係空氣汙染概念？仲要雷射式針對大陸啲最有錢地方嘅空氣汙染？」心欣諗都唔使諗就講出我心裏面嗰間話：「京能能源（579），主要喺北京做天然氣發電。但點解咁問嘅？兩會呀？」
其他公司會唔會受惠？會，但肯定冇京能咁集中，公司本身市盈率、股價都未反映呢段片揭嘅兩會議程。始終，《穹頂之下》嘅柴靜住邊？咪就係北京囉！仲唔不問價追京能？
孫柏文
獨立股評人
http://facebook.com/shuen
本欄逢周二刊出
孫柏文
金手指 - 孫柏文 舊文
