中環在線：金山少爺衝出香港
都爹利會館打算歐美開店
■羅揚傑身後的作品，為藝術家Rodel Tapaya所畫的《The Paradox of Plenty》，將於周四展出。 李潤芳攝
藝壇盛事巴塞爾藝術展（Art Basel）將於周日第三度在港舉行，新世界發展（017）主席鄭家純女婿龐建貽與金山工業（040）第二代羅揚傑（Alan）二○一三年就係趁Art Basel首次在港舉行，想畀圈內人有個聚腳點，喺中環開設都爹利會館，又出奇地成功，佢哋𠵱家就諗緊喺歐美開分店，宣揚呢個香港品牌。
■都爹利會館內陳列咗各式各樣嘅藝術品。 舊年獲米芝蓮二星
Alan係金山主席羅仲榮兒子，佢雖然畢業於美國普林斯頓大學建築系，但唔打算做呢行，亦冇諗過子承父業，反而對飲食與藝術有濃厚興趣。幸運嘅係，佢爸爸亦冇要求佢返去金山幫手，任由佢發展自己喜歡嘅事業，難怪佢話𠵱家好滿足，「做緊自己每秒都好享受嘅工作」。
Alan二○○六年問爸爸借來二百萬元，就跟龐建貽等人合作喺上環開首間餐廳Classified，之後一路開其他品牌嘅餐廳，𠵱家有超過十五間餐廳。佢憶述，當年爸爸同佢講「如果輸曬呢二百萬，就好耐都唔使問佢攞錢！」好在九年下來，佢嘅餐廳全部賺錢，叫做還得神落。
其中，都爹利會館算係最具特色，呢間粵菜館舊年獲米芝蓮二星，最特別係餐廳周圍放滿藝術品，每年又舉行三次藝術展覽，本周四至六月就跟英國當代藝術學院（ICA）合辦海外展。
Alan就形容，結合餐飲與藝術呢個概念係「從天而降」嘅，歐美都冇呢類食肆，既然成功，佢就希望將呢個香港品牌帶出去，「其實任何一個擁有藝術社群嘅城市都適合做（都爹利會館）」咁話。
李華華
mailto:LiWaWa@AppleDaily.com
李華華
LiWaWa@AppleDaily.com
中環在線 - 李華華 舊文
