情陷夜中環：瞞神
■玩過德州撲克的朋友一定同意，用bluff嚟贏錢，成功感會大過用「四條A」嚟贏錢。 互聯網
曾經從兩個完全不同渠道，聽過一個傳說，是關於城中某位巨富的。雖然這個傳說非常戲劇化，但亦因為這位巨富的確以「沙膽」見稱，所以至今也沒有人敢說這個傳說到底孰真孰假。
沙膽富豪於年輕時候，已經出名智勇兼備，生意做得很大。但就在他攀上人生第一個高峯之後，他被生意夥伴出賣。傳聞這個生意夥伴因為炒輸期指而欠下巨債，之後偷偷拿走公司大量現金「填氹」。禍不單行，適逢那時香港經濟開始往下走，客戶的數期越拖越長，讓沙膽富豪突然陷入周轉不靈的困局。
四面楚歌，沙膽兄沒有其他選擇，惟有自掏荷包解決公司的營運問題，幸好還算暫時頂得住。可是，任沙膽兄怎樣死撐爛撐，公司財困的消息也終於傳到一位「好朋友」耳邊。這個所謂「好朋友」，是某銀行的總經理，而這銀行也就是跟沙膽兄公司來往得最頻繁的銀行。
生意上的友誼，從來只是建基於錢，聰明的沙膽兄又怎會不明白這個道理？銀行總經理一聽聞沙膽兄的財困消息，立刻約他出來見面。白癡都知，總經理不是要跟富豪噓寒問暖，而是要向沙膽兄call loan。每期的還款，沙膽兄尚可勉強撐住，但要他立刻找清全數，根本沒有可能。
富豪膽博膽 成功解財困
另一邊廂，沙膽兄的其中一位客戶，承諾很快就可以給他找數，但可能要多等幾個星期。但如果銀行真係call loan，沙膽兄未收到個客筆錢，已經要宣佈玩完。所以，沙膽兄的目標很清晰：只要銀行唔call loan，畀佢捱多幾星期，到時個客一找數，一切就有轉機。但問題是，全世界最現實就是銀行，要佢哋唔call loan，有乜嘢方法？故事講到呢度，九成真。至於富豪如何解決銀行call loan的問題，才是這個傳說的開始。
沙膽兄動用佢餘下嘅整副身家，買咗樣嘢。佢唔係幫公司買嘢，係幫佢自己買嘢，佢買咗架當年最新型號嘅勞斯萊斯。約會銀行經理見面當日，沙膽兄提議先吃個午飯，還要走到淺水灣吃。如此有情調，所謂何事？目的就是要親自到銀行總部接送總經理，讓他看到這部勞斯萊斯。「陳生，部車好靚喎。」總經理一上車就跟沙膽兄說。哦，想買架好耐啦，上個月出新款，梗係要獎勵嚇自己。
之後的車程，沙膽兄就由這部勞斯萊斯開始，大談他公司的現況和未來大計。總經理越聽就越入神，而沙膽兄當然就越說越起勁。直到午飯過後，總經理已經對沙膽兄的鴻圖大計為之著迷。「陳生，所以我成日都同朋友講，你真係一個生意奇才。之前仲有謠言話你公司財困，我梗係唔信啦！」財困都唔會買到呢架車啦，你估我儍㗎咩，沙膽兄說。
聽聞，沙膽兄把總經理送回銀行之後，他做的第一件事就是叫司機將架車停埋一邊，然後叫佢個司機一齊落車。「阿祥，你有冇煙？畀支我。」沙膽兄問司機。有呀老闆，但你唔係戒咗咩？「我𠵱家個心跳得好快，要定一定驚。」幾日後，總經理致電沙膽兄，唔係要call佢loan，而係通知佢，銀行加大咗佢條credit line。
我同意，講大話係唔啱，所以學校教我哋唔好講大話。但係出嚟社會做事，唔識講大話真係好蝕。忠忠直直絕對值得歌頌，但我寧願你唔歌頌我，都唔想搵唔到食。學校希望我哋將來搵到食，但係又唔教我哋出嚟搵食嘅最重要伎倆，即是講大話。點解學校唔教？未必係因為佢哋覺得唔啱所以唔教，而係可能連佢哋都唔識教。
講大話有豐富的層次，剛才由沙膽兄示範的，是最高層次。這個最高層次，英文有個傳神的字，叫做bluff。所謂bluff，就有虛張聲勢、言過其實的意思，而bluff的背後通常存在實際動機。玩過德州撲克的朋友一定同意，用bluff嚟贏錢，成功感會大過用「四條A」嚟贏錢。
Bluff贏，即係你明明裏面乜都冇，但又扮到揸住好大牌，令到對方就算有牌都唔敢同你博，最後成功贏錢。專業的撲克玩家，唔會係又bluff唔係又bluff。佢哋通常會根據對手嘅betting pattern（落注模式）、眼神，甚至乎頸部嘅脈搏跳動，去分析對手揸緊乜嘢牌，從而決定bluff贏的機會率有多少。So you see，bluff係一件幾型嘅事。
咁當然，每個行業都有bluff的機會，至於是否會bluff贏，就得看閣下功力了。做我呢行，當然更加唔可以亂bluff。我有個行家在Deutsche Bank工作，她其中一位客戶的年薪次次天文數字。佢話佢每次同呢個客講嘢，唔口震已經偷笑。「人哋個腦轉得快咁多，唔好話bluff，你簡單打個招呼都要諗清諗楚講乜嘢。」工作上的bluff需要勇氣，其他事情上，如果有bluff的必要，你會需要更大的勇氣。
講大話分高低 吹水最雞
有沒有跟一些變態的女人拍過拖？我試過，但也只是維持極短暫的時間。變態的意思，就是她天生缺乏一種安全感，只要你跟其他女孩子有任何來往，佢都會即刻發癲。尤其是當你跟以前的女朋友來往，佢就會癲上加癲。有一次，我嘗試瞞天過海，同以前一個女朋友出嚟食飯。呢位前度，今日想起，也依然百般懷念。她是開花舖的，淨係呢個賣點已經夠殺。我們久不久都會出來聚聚，但自從跟這個變態女友交往後，與這位花舖女孩的見面次數也少了許多。終於，我們也找到機會出來聚聚。每次跟花舖女孩提議去一些高級餐廳吃飯，她都會說不好，她喜歡去氣氛悠閒的coffee shop。佢呢種性格，又係殺死人。
那一晚跟她吃完晚飯，提議和她來張合照，她沒有拒絕。影完相，梗係send番畀佢。點知，呢個世界真係天網恢恢，似乎冥冥中注定我要「瀨嘢」，我竟然唔小心將嗰張相send咗畀變態女友！說時遲那時快，我的電話已經響起，來電顯示是變態女友。我決定沙膽兄上身，同佢賭一鋪。
「喂。」我說，強行掩飾內心的恐懼。你點解會同佢一齊？佢把聲震曬。我裝出語重心長的語氣說：「儍豬，我咁啱喺間coffee shop撞到佢，跟住影張相畀你睇，就係咁簡單。」點解要影張相畀我睇？佢把聲繼續好震，但又帶點好奇。我繼續語重心長，開始控制大局，說：「儍豬，咁唔通你想我瞞住你，唔話畀你聽我撞到佢？」咁又唔係，她說，把聲開始冇咁震。咁但係你撞到佢，都唔使影相喎。
又估唔到你蠢唔曬，好彩我嘅轉數都唔慢得過沙膽兄好多。我把聲線調得更溫柔，說：「儍豬，你諗嚇啦，張相影嚟係畀你睇嘅。我就係想話畀你聽，我同佢只不過係普通朋友，冇嘢需要隱瞞你。如果我同佢有嘢，就算影咗相都唔會send畀你睇啦。」咁複雜嘅邏輯，佢應該有排消化，但最緊要係，佢最後信咗我。
Bluff係講大話嘅最高層次，需要高度的分析力和膽識。至於講大話嘅最低層次，就係俗語所謂嘅「吹水」。一個吹水的人，講大話只有一個目的，就是掩飾心中的自卑感。呢啲吹水精，每個人身邊都總有一兩個。我的一個中學同學，就是吹水精的表表者。中一嗰陣，佢同我講周慧敏去咗佢生日會；中三嗰陣，佢話鄭伊健間唱片公司簽咗佢；中六仲誇，佢住喺九龍城一個六百呎單位，但係佢同我講佢屋企人嗰間九龍塘獨立屋租緊畀人。
講大話唔係一件容易嘅事，所以喺講大話之前，記住用嚇腦。好多時，你嘅朋友唔踢爆你，唔係因為佢哋蠢，而係因為話你戇X，真係驚你嬲。
葉朗程
葉朗程
情陷夜中環 - 葉朗程 舊文
