中環在線：潮追韓流 《星星》由頭睇到尾
陳德霖也愛煲韓劇
■陳德霖有唔少興趣，包括煲劇。
金管局總裁陳德霖（Norman）平時面對公眾說話，通常一句就一句，兼且冇乜表情，畀人冷冰冰嘅感覺；而貴為金管局總裁，大家總覺得佢日理萬機，日常生活除咗工作，應該都係工作，但原來佢跟好多人一樣鍾意煲劇，舊年大熱韓劇《來自星星的你》，佢都由頭煲到尾，認真估佢唔到！
初時以為金秀賢是女人
聞說，陳德霖喺工作以外，都有唔少興趣，打高爾夫球、聽音樂、睇舞台表演等樣樣都啱，就連大家最鍾意嘅煲劇，佢都有煲埋一份。不過佢嘅工作始終比較忙，未必可以坐低煲幾集，只可以有空檔時睇15分鐘或者一集、半集。
一講到煲劇，當然唔少得舊年紅到𠵱家嘅《星星》喇，劇中兩位男女主角金秀賢與全智賢，憑呢套劇人氣急升，廣告多到不得了；事隔一年，最近仲攞到最具影響力電視劇演員獎，都咪話唔誇張！
陳德霖同人提起《星星》都有紋有路，講得出成個劇情同埋裏面嘅細節位，真係由頭睇到尾，唔係不停按快鏡，大概知道劇情就算。佢最初睇呢套劇，好奇怪點解金秀賢飾演嘅都敏俊經常木無表情，好似唔識做戲咁樣，知道佢喺地球生活400年嘅外星人、又唔可以跟其他人產生感情才覺合理。
最搞笑係，由於韓星嘅名字幾相近，金秀賢、全智賢聽落又好似差冇幾，陳德霖未睇《星星》之前，一直以為金秀賢係女演員，睇咗先知道佢係靚仔一名。金秀賢有套新劇將會喺下月首播，到時陳德霖會唔會捧場呢？
李華華
mailto:LiWaWa@AppleDaily.com
李華華
LiWaWa@AppleDaily.com
中環在線 - 李華華 舊文
