中環在線：羅寶文攞獎攞到去挪威
成首位港人得獎者
■羅寶文噚日心情大靚咁同華華講，一定會飛去挪威領獎。 資料圖片
富豪（078）太子女羅寶文（Poman）攞獎攞到去挪威！Poman舊年成為世界十大傑青後，最近獲挪威奧斯陸嘅Business for Peace Foundation頒發Business for Peace Award，成為首位港人得獎者。
太多獎攞 父親羅旭瑞搞唔清
挪威奧斯陸出名係諾貝爾和平獎聖地，Business for Peace Foundation於2007年成立，2009年舉辦一年一度Peace Award，選出幾位致力推動可持續發展嘅領袖，工行（1398）董事長薑建清曾經獲獎，今年有5位得獎。
Poman噚日心情好靚咁話，驚訝自己得獎，因為呢個獎冇得報名，係評審團內部遴選，「我都覺得好厲害，之前嘅得獎者真係好勁，全部都係嗰個行業最有代表性，唔少仲做到我阿爺！」
頒獎禮喺5月初舉行，為尊重大會，Poman一定會飛去挪威領獎。佢都好開心，評審團對中國文化、兒童德育發展咁重視同支持。Poman一向孝順，當然諗住帶埋屋企人一齊去挪威喇。問到爸爸羅旭瑞有咩反應，Poman笑住話：「Daddy都搞唔清楚邊個獎打邊個獎！」
富豪除咗經營酒店，都有出租私人飛機，Poman飛去挪威應該話咁易，但佢竟然諗住幫襯航空公司，事關用咗自己嘅飛機，「就要唔做人哋生意喎！」
至於會唔會好似上次攞三料傑青咁，喺旗下酒店舉行慶祝會？Poman就好尷尬咁答：「嚇又搞？哈哈。」
李華華
mailto:LiWaWa@AppleDaily.com
李華華
LiWaWa@AppleDaily.com
中環在線 - 李華華 舊文
