金手指：不問價追利記
■陳伯中任主席的利記，市值得8億元，市賬率得0.8倍，殼股味濃。 資料圖片
噚日，孫柏文叫幾次「不問價追」嘅摩比（947）爆上，不過今日要講番上周三。當日全市恐慌性買貨，嗰朝睇升幅榜，如係fans，首位金寶通（320）一定好熟。點解？Google「金寶通」，一睇就見2013年尾我「不問價追金寶通」嘅文，長期高據搜尋榜前列，因我最早兼最大聲推。當時我話過嗰刻市值得8億元嘅香港老牌企業，資產負債表兼公司架構啱曬賣殼。見報日大裂上開1.1元。
8億市值殼味濃
我亦警告話博賣殼要等，而長假前都仲係1.1元附近。點知一路冇新聞下，到噚日高見2.7元，收市價2.5元。點解？因市場資金開始喺啲「應被收購股」中尋寶！今日正式宣佈「不問價追金寶通」到價！咁下一隻係乜？其實，2013年尾殼股熱，當時同個老炒家朋友傾過後推介過三間「應被收購股」，中慧（1143）、利記（637）、金寶通。中慧推介後一周，升三成叫到價，金寶通就今日叫落車。唯一一隻未，就係今日重申叫不問價追嘅利記。
最諷刺係三隻裏，靠炒股致富、身家過十億嘅老炒家朋友同我都覺最靚係利記。原因除咗係香港老牌企業外，佢啲資產比其他兩間易明易賣，資產負債表亦係神級咁抵。利記以前係間典型香港貿易行，出入口鋅鐵zinc，講吞吐量亦係世界級。點知第二代接手後更專業化，2013年先攞倫敦金屬所LME牌，早兩周攞埋香港證監期貨牌，搖身一變做有實貨嘅商品莊家！老炒家都係喺海嘯前1.52元入貨，昨日收1.14元，即市價買都仲低過佢好多，佢話資產加啲牌照要2.73元一股先賣（佢海嘯前1.1元入金寶通，之後跌穿0.4元都未驚過，上周2.1元沽清）。
仲唔明點解要不問價追？即如果你係間大陸金融機構、證券公司，想即刻有有規模嘅國際商品買賣能力，而你啲股票忽然好值錢可買嘢，你就會諗市值得8億元，市賬率得0.8倍嘅利記。炒殼股，金寶通後，不問價追利記。
孫柏文
獨立股評人
http://facebook.com/shuen
本欄逢周二刊出
孫柏文
金手指 - 孫柏文 舊文
