一周三件 - 錢雋 2015年5月15日
一周三件：瑞年谷底等爆
■王福才任主席的瑞年國際，股價低殘，值博率高。 資料圖片
阿里巴巴掌舵人馬雲話過，下個超過佢嘅人，一定喺健康產業裏面。咁有份量嘅大孖沙，睇呢瓣行業前景係好到爆炸，加埋中港超級牛市大時代，簡直光環，但場內嘅瑞年國際（2010），得3倍幾PE，五年海底價，係殘上加殘。
估值平絕醫藥零售
瑞年主打氨基酸保健產品同飲品，已經講明分拆保健飲品上市。而集團又新鮮熱辣，同零售藥店艾利爾簽訂戰略合作協議，計劃喺完成收購艾利爾之後，大大力發展零售藥店，希望喺兩年內上到3,000間水平。
瑞年成條路線，係透過分拆，大享肥仔增值，再通過手頭勁厚淨現金13.7億元，進行拓展，實行藥業、保健產品兩瓣齊齊上。而據諮詢機構預測，祖國保健產品市場，將以每年11%增幅，上到2020年時5,000億元規模。又除咗阿爺計劃，去到2020年，祖國健康產業規模，達到8萬億元人仔，藥監局旗下南方醫藥經濟研究所預測，單係今年藥品終端市場，會去到1.4萬億元人仔。祖國藥業、保健產品市場潛力勁厚，加埋上邊瑞年拓展，嚟緊嘅日子，成績單應該仲醒神。
又係咁意估瑞年今明兩年，只係keep住上年16%盈利增長，明年EPS0.72元，現價（2.68元）潛喺近五年底，預測PE得3.7倍；而未計分拆飲品增值前PB，亦只係得0.55倍。
場內同樣有醫藥零售，或者係保健行家，金天醫藥（2211），明年10倍PE，2.6倍PB、白雲山（874）21倍PE，4倍PB，又祖國太太口服液嘅健康元（滬600380）往績82倍PE，7.4倍PB。瑞年PE、PB係平霸！
買瑞年，當翻一番到5.4元計，明年預測7倍幾PE，都仲未追到最近磅嘅金天，超級牛市下呢個PE水位，算係乜？
錢雋
細價股專家
本欄逢周一、三、五刊出
錢雋
一周三件 - 錢雋 舊文
