股仔暴炒
2015年05月15日
睇指數，港股今個星期呆呆滯滯；睇成交，都係慢溜格局，但唔好睇表面奄悶，好似無乜氣氛，但在牛市之中，資金就搵唔同的股份炒作，如果揀啱對象，炒起上嚟都不愁寂寞。
呢排炒作股份有幾類，一類係背後有大型民企支持，好似同阿里巴巴、恒大(3333) 、萬達
相關；另一類就係市值較細的毫子股。有大型民企老闆概念嘅股份吸引股民興趣，最直接係因為呢啲老闆多數睇通中央思路，一舉一動都投合政策概念，加上內地由房地產帶動內需的高速增長，變成要搵其他火車頭，呢啲老闆自然希望可以密謀變招，股市有景，佢哋不會坐塘邊鶴只係睇，佢哋嘅相關股份炒作起來可以好犀利。但股民當然要知道，係「投機的我」在操作，千萬不要太瞓身。
大老闆概念股爆上
好似昨日內地房地產兩大巨頭萬達及萬科公佈戰略合作，雙方將在房地產相關領域的發展進一步聯手。兩間公司同系股價造好，萬達酒店(169) 一度爆升35%，萬達商業(3699) 亦一度升3.6%。
後來萬達酒店(169) 董事會出通告表示，已知悉公司股價及成交量上升，經合理查詢後，確認並不知悉導致價格及成交量波動的任何原因，投資者冷靜下來，股價升幅又收窄，萬達酒店收市報2.1元，升11%，萬達商業升幅收窄到1.8%。好似呢類有大老闆做招牌的股份，最好係見佢唔郁時就買少少，一郁就加注，爆升就食胡。如果見佢爆升至追入，咁就好容易買貴貨坐艇。
另一類就係毫子股，呢排毫子股輪流炒，主要係博佢賣盤。中環茶友話，依家一隻乾乾淨淨的殼，閒閒哋都話值4、5億元，於是資金就有理無理搵細市值的股份炒作一番。好似昨日熱炒的中國新經濟(080) ，收市報0.65元，升足三成後，市值都係三億幾，仲送埋個靚冧巴。呢間公司上市唔夠五年，過去幾年時賺時蝕，由於入場費低，所以突然爆升。炒呢類冷門股，三年唔發市，發市當三年，最緊要係唔好撞着無良大股東，炒完之後唔賣盤兼派埋貨，再玩供股合股收貨。所以投機炒作前，最好都起起大股東個底，有無瘋狂抽水記錄。
大市昨日繼續受疲弱數據左右，內地4月份零售銷售以至新增人民幣貸款等多項經濟數據均見疲弱，經濟未見好轉，內地股市表現反覆。恒指收市昨收報27286點，升37點；國企指數收報13775點，跌83點，成交額1266.2億元。
盡顯內地炒家本色
大價股全賴單天保至尊，騰訊(700) 獨撐大市，全日升4.5元，報161.3元，跑贏一眾藍籌，貢獻恒指升幅75點。科網股乘勢炒上，連日爆上的網龍(777) 再升5.9%，報35.95元；中國擎天軟件(1297) 急升13%，報7.48元；金蝶國際(268) 飆6%，收5.19元。手遊網遊股亦有追捧，博雅互動(434) 大漲9%，報8.49元；雲遊(484) 仲勁，急升15%，收19.64元。
另外，二、三線股再有精采「演出」，成謙聲匯(2728) 連升三日後，股價早上創上市新高3.12元，之後股價回軟，到近3點急跌，最低曾見1.9元，跌幅高達34%。臨收市前10分鐘又玩急彈，收報2.68元，跌7%，成交金額1.3億元，盡顯內地炒家狂抽猛插的本色。
陸羽仁
金融High Tea 舊文
