魚樂無窮：一隻五倍PE變身股
■賽特拍得北京城建道橋呢個大碼頭，爆升變得合情合理。圖為集團主席蔣建強。 資料圖片
上市公司玩變身，十居其九因為原先業務不濟，要搵頭好住家（賣殼），或者母公司注資，務求由壞學生變成高材生。如果學生本身成績勁抽，兼有星級老師補習呢？想唔做十優狀元都難囉（唐
牛仲停留喺會考階段）！半新股中國賽特（153），正正就係新一代股壇狀元。
賽特周三晚發通告，有兩個重點。1.與北京城建道橋及宜興鴻瑞訂立諒解備忘錄，賽特有意向北京城建道橋配股，佔已發行股本15%，認購價較正式認購協議日期當日收市價溢價15%至30%，惟不得低於招股價1.03元；2.三方計劃成立合營，持股比例分別為51%、40%及9%，註冊資本3億人仔，業務範圍包括保障房、預製構件、鋼結構、道路、橋樑、基建設施建設及環保建設項目。
翻查資料，北京城建道橋1983年由原基建工程兵部隊集體轉業改編組建而成，已有30多年歷史，主要以路橋市政為主業，經營規模過百億，乃中國500家最大建築企業，一個字形容︰猛！賽特拍得呢個大碼頭，單日爆升四成變得合情合理。不過，賽特亦唔係省油嘅燈，2013年底上市，單計江蘇省，乃第二大預製組件商及第三大鋼結構供應商，盈利連續四年有增長，最新PE只得4.9倍，平到笑！噚日一棍掃清所有蟹貨兼創新高，最新市值仍僅20億元，可塑性大到你唔信！
唐牛
https://www.facebook.com/tongcow88
唐牛
魚樂無窮 - 唐牛 舊文
