中環在線：周嘉儀捕獲李小加
港交所酒會首見面 主動邀合作
■周嘉儀（右）首次以興證香港董事身份出席港交所酒會，難怪咁落力主動同李小加打招呼。 王子俊攝
大台前小花周嘉儀捕獲港交所（388）行政總裁李小加！噚日係港交所（388）慶祝上市15周年酒會，金融界幾乎全體出動幫港交所賀生日，
現任興證（香港）市場拓展部聯席董事嘅周嘉儀（Venus），以一襲黃裙到場，喺以黑白灰西裝為主嘅會場出現，特別醒目。
Venus一見到李小加就主動上前打招呼兼換卡片，之後就傾咗一陣偈。Venus以前主要負責讀新聞，好少跑新聞，當然冇乜機會見到李小加。
李小加好掛住夏佳理
佢都話，今次係第一次親身認識李小加，佢希望邀請對方幫手「拍（攝）啲嘢」，所以預先嚟打聲招呼。李小加出名口才了得，出鏡做節目絕對唔成問題，唔知Venus想搵李小加合作講乜東東呢？不過李小加噚日就將個波交咗畀公關大員，之後再去招呼其他賓客。
賓客當中，李小加肯定最想見到2006至2013年擔任港交所主席嘅夏佳理，事關夏佳理一向對李小加有高度評價，兩人共事時合作無間。
夏佳理噚日一入場，李小加就衝埋去攬住夏佳理，講咗一句「I miss you（我好掛住你）」。的確，兩人𠵱家各有各忙，相信真係好耐冇見過，難怪一見面就真情流露。
夏佳理之後見到財經事務及庫務局局長陳家強又狂吹水。李小加就跟港交所主席周松崗齊齊拎住大相框影相，開心share嘞。
■周松崗（左）與李小加齊齊拎住港交所大相框影相。 
■陳家強（左）同夏佳理有講有笑。 黃翹恩攝 李華華
mailto:LiWaWa@AppleDaily.com
李華華
LiWaWa@AppleDaily.com
中環在線 - 李華華 舊文
