A股V彈 憧憬跌完
2015年06月24日
歐債危機紓緩，美股高收，不過講戲劇性，A股就完全贏晒，內地股市長假後復市劇烈波動。匯豐6月中國製造業PMI創三個月以來最高，加上四大證券報發功挺A股，內地股市低開後回升一陣，上證指數突掉頭急插4.8%，深成指數更大跌5%。但其後中資金融股力
撐，配合買盤在低位吸納，A股V型反彈，全面收復失地，最終滬深兩市升逾2%，挨近全日高位收市，兩市逾百隻股份升停板，上證指數高低相差313點，接近7%波幅。A股撻完又彈，令港股開市繼續造好，國企指數跑贏大市。
呢排A股因為大量抽血變成乏力腳軟，股民有啲心慌慌，內地媒體於是開始替個市打打氣。《中國證券報》頭條以《穩增長政策不停歇調整務實慢牛走勢》為題，力稱「改革牛」依然底氣十足，呼籲市場無須過度恐慌。
內媒高舉政策牛旗幟
文章話，不少市場人士認為，雖然當前宏觀經濟下行壓力依然較大，但中國已推出一系列穩增長、調結構、促改革的政策，且穩增長後續政策儲備工具充足，經濟增速有望在第三季度末觸底回升。
文章從證監會規範「兩融」業務來看，近期發表的《證券公司融資融券管理辦法(徵求意見稿)》鬆緊並舉，旨在建立逆周期的市場調節機制。這為融資業務留下萬億元的增長空間，並將引導外圍槓桿資金回歸兩融，允許兩融展期將支持長牛發展。
官方媒體出來安撫市場情緒，顯然怕個市跌得太厲害，陸羽仁覺得反正呢隻係「政策牛」，市場慣了捕捉中央心態炒作，從阿爺依家角度，大市升得太急的話，單係批新股抽水就發揮到鎮靜作用，咁樣既可擴大股權融資深度，又可令股市氣氛無咁熾熱，可以話一舉兩得。但阿爺怕個市跌得過份，除咗出口術外，自然又會減慢新股上市，從咁樣睇中央根本大把招數在手啦。
內地市V型反彈下，上證綜指低見4264點，比高位跌咗914點，回調17.7%，回調幅度唔細，最後反彈收4576點，令人憧憬4264點係唔係已經見咗呢一浪的低位。
恒指在A股急回時已經唔想落，最多跌74點，之後人彈佢更彈，收造27333點，升252點；國企指數收報13609點，升225點，成交增至1360億元，成交都上返啲。
內航股好似東航(670) 、南航(1055) 紛創新高，另外股仔喺交投回升下都生猛番，呢排股仔或者冷門股興玩派嘢，個別公司送紅股或認股證，就炒到飛天，呢啲有動作配合的股份，你話佢危險，叫人唔好玩咩，佢就不停咁升畀你睇，你話叫人玩埋一份，佢有時就會插到阿媽都唔認得。我只能講呢類股份係投機對象，要時時嘜緊至好落場。
股仔興玩派嘢
有份玩派送的公司，部份係冷門但唔係細股，好似李四叔隻美麗華(071) ，市值81億元，資產淨值百幾億元，呢個月佢就建議按五送一派紅利認股證。
四叔系興送紅股，美麗華可能業績無恒基同煤氣咁穩定，所以唔送紅股改送窩輪，有禮物派之餘仲安排埋日後集資，喺公佈之後美麗華股份就一度湧上一年新高。
昨日另一隻有動作股份係嘉耀控股(1626) ，公司披露董事會會議將於7月3日舉行，屆時考慮建議、宣派及派付特別股息，消息公佈後股份就撩高咗一陣。
睇番集團一年前上市，業務主要在中國從事紙質卷煙包裝(其次是社會產品紙質包裝)的設計、生產及銷售。集團的主要營運附屬公司湖北金三峽於中國成立逾二十載。過去一年佢股價絕對唔失禮，今年四月左右由1.5元起步，一路升到昨日3.89元的歷史新高，想跟車者要留意係佢派乜嘢特別息依家仲未知。
陸羽仁
金融High Tea 舊文
