金手指：蔣麗芸勇講真話
■蔣麗芸議員一篇網上言論，引起廣泛討論。 資料圖片
噚日孫柏文見林依麗喺facebook分享一篇蔣麗芸議員網上言論。原本無留意，因林姨姨同蘭花系走得埋，分享兼揼建制派差不多最有戰鬥力嘅元秋，應無驚喜。原來林姨姨鬧蔣議員係因有人問蔣議員關於國內上fb嘅事。段對話
先有潘佩璆議員「英雄救美」，話喺大陸用數據漫遊的話係上到fb，但用wifi就唔得。有網友問點解wifi唔得，點知蔣議員親自答：「電訊公司要賺錢。」睇到呢度我忽然感動到差不多喊出來。
政策傾斜 屈機搵錢
點解？因蔣議員差啲為廣大香港市民爆國家機密！上世紀50年代，花旗國總統艾森豪威爾已警告話當政府官僚中，特別係軍隊人員同做軍火製造商走得好埋時，就會有樣叫military industrial complex出現。之後就會用華麗兼逼切理由，運用政策傾斜去屈機搵錢。
當年若花旗國國民覺得佢哋處處受敵，周圍都有外國勢力想摧毀佢哋，國會就好容易通過撥款買軍火。咁關蔣議員咩事？好儍好天真嘅網友純粹覺得中共嚇嚇都想箝制言論自由，故先大陸禁fb。其實禁任何嘢特別係市民想要嘅嘢，係要用好多資源同政治資本。啲資源同原動力喺邊到來？你諗嚇Google入唔到大陸，邊個最得益？fb、WhatsApp入唔到又邊個最著數？成個外國勢力間諜嘅局面係會造就好多商機。即fb入唔到大陸最大原因，就係有人想玩啲原始貿易保護主意。但就咁講冇人服，故就不段製造bogeyman去嚇人。呢招唔係淨係大陸咁玩，花旗國、英國都一樣，只不過佢哋驚嘅外國勢力喺中東。
大家唔好淨係笑大陸，因香港都大把人，因「香港處處外國勢力」大飲奶水、肥肥白白。係邊個？Follow the money就得。最後順帶一提，騰訊（700）周三出業績。
孫柏文
獨立股評人
http://facebook.com/shuen
本欄逢周二刊出
孫柏文
金手指 - 孫柏文 舊文
