魚樂無窮：反彈浪左右開弓
■國慶假期A股休市，港股無後顧之憂狂炒。 資料圖片
國慶假期A股休市，港股無後顧之憂狂炒，10月第一個交易日大升659點，升幅非常全面，九成半藍籌造好，H股指數成份股更全線上升，捱足咁多日悶市嘅戰友，終於有回報。美股大奇蹟日，道指由跌258點變成倒升200點
，港股今日高開冇難度，但究竟可以升到幾時，不妨畀幾個數據大家參考。
第一，近三年國慶假期A股休市時，港股清一色上升，A股將於星期四復市，意味嚟緊三日，好大機會係炒作港股安全期；第二，最新恒指熊證街貨量比牛證多咗足足兩倍，係近期新高，全城散戶造淡，根據相反理論，你都知道會係點啦。第三，耳聞目測身邊好多戰友，依然按兵不動，少人參與嘅股市，要挾上更得心應手。
入正題，短炒搵食炒乜好？正路之選一定係中資金融股，唐牛比較鍾情光大控股（165），一來業績勁（中期盈利為去年度嘅1.26倍），二來有重組憧憬，三來圖表醞釀突破，隨時一棍衝上廿蚊。扒冷可試汽車經銷商美東汽車（1268）。「汽車股炒國策炒到癲啦，仲有計？」美東今浪其實僅升一成左右，同業卻普遍升兩三成，美東嚴重落後，難怪公司近期積極回購，在資金輪流炒下，美東好快有一番作為，上番50日線1.03元，都有13%利潤落袋！
唐牛
https://www.facebook.com/tongcow88
唐牛
魚樂無窮 - 唐牛 舊文
