挾淡倉
2015/10/05 09:34:09
網誌分類: 經濟
美國就業情況急轉壞，加息又現變數。美國上週五公佈的9月份非農就業只增加了14.2萬人，遠差過預期的20.1萬，對市場造成更大衝擊的是勞工部同時修訂了7月及8月的增幅，其中8月增幅由17.3萬人大幅調低至13.6萬，反映美國勞
動市場認真唔靚仔，並非此前所講的咁健康。
經濟學家和市場策略師均認為，就業情況疲弱，將打亂了聯儲局今年開始加息的計畫。投資者先受壞消息影響，杜指上週五朝早先插超過260點，但跌到16000點邊緣已見支持，隨後又將經濟的壞消息當好消息炒，股市強勁反彈，而已愈升愈有，收市倒升200點至16472點，升幅1.2%，上下差幅近460點；標普500指數升28點，收報1951點，升幅1.4%；納指跑贏大市，漲81點至4708點，升幅超過1.7%。
美國可能加唔到息，美元下挫，油、金反彈。國際油價上週五亦係先跌後回穩，BMO Capital的Sal Guatieri認為，聯儲局10月不會有行動，除非未來兩個月的就業增長顯著反彈，聯儲局12月也會按兵不動。而紐約梅隆銀行的Marvin Loh認為則維持當局明年3月首次加息的預期。
市場對於聯儲局年底加息預期降溫，美元兌六隻主要貨幣匯價的美元指數上週五朝早的96.36跳水至95.31，收市回升至95.86，推動紐約油價由每桶44美元邊緣回升至45.54美元。油價回穩，能源股顯著造好，杜瓊斯能源指數大升4%，成為推動大市反彈的主要力量。
美國就業市場咁差勁，究竟後市會點呢，有紐約資深分析師認為，恐怕未來華爾街交易員會一如過去幾個星期一樣：少做少錯。因為由於不明朗因素太多，如果下注或者落重注，一旦落錯注，不但影響其表現，也會影響其年底花紅，最終可能連份工都無埋。
這解釋了美股大市近期交投量正常，但股價卻走軟，因為市場缺乏正常買貨興趣，所以即使沽壓只是正常水平，都無足夠買盤頂住，令股市陰陰跌。睇股票恐懼指標VIX指數回落7%至20的水平，反映投資者其實唔係好驚慌（panic），只係在「罷工」，唔買貨而矣。所以美股反彈後，怕又佢又會腳軟軟。
內地股市放國慶假放到10月7日，之前港股只是自由行，個勢似搶在內地之前先炒一浪反彈，挾死淡倉，到內地開市又彈升，由於港股已升先，可以借內地反彈時出貨，走完一個小反彈浪潮。
陸羽仁
回應(4) 我想回應
陸羽仁 BLOG 舊文
