中環在線 - 李華華 2015年10月7日
中環在線：億元買羅素街8號全層
東方紅少爺平價掃樓上舖
■東方紅藥業太子爺林志堯
零售業氣氛差，地舖租金已經一減再減，樓上舖更加係慘到冇人租。不過，老字號參茸店東方紅藥業嘅太子爺同一班管理層，就無懼租金跌兼市道差，用超過1億買入銅鑼灣羅素街8號全層樓上舖。
■羅素街8號6樓全層（紅框示），呎售2.16萬元。 呎價平麥紹棠單位三成
東方紅等人買入嘅樓上舖係羅素街8號英皇鐘錶珠寶中心6樓全層，大約4,718方呎，以1.02億元由采得有限公司買入，呎價2.16萬元。翻查資料，采得嘅公司董事包括林韋鋒、林志堯及林汕。林志堯就係東方紅藥業太子爺，現時喺集團任職銷售經理；林韋鋒更加係東方紅集團董事總經理，林汕亦為公司管理層。
今次東方紅買入嘅單位其實係撻定重售貨，單位曾經喺今年6月以1.1億元賣過一轉，但兩個月後就撻咗定，如今重售，成交價平咗800萬元或7.3%。
呢幢羅素街8號喺舊年拆售，當時好快就成幢幾乎賣曬，呎價全部3萬元以上，藝人麥浚龍爸爸麥紹棠，亦斥2.9億元買入兩層，呎價3.15萬元。
但之後大廈有幾層撻定，就開始越賣越平，東方紅今次以低價接貨，比麥紹棠嗰兩層平超過三成。雖然價錢好似幾筍，不過成幢樓入夥近一年，空置率超過九成，猶如死城一樣，就算租出都係做名牌特賣場，人流麻麻哋。
唔知東方紅太子爺買入呢個單位會有乜嘢部署呢？租唔出，都可以自用，叫做喺羅素街有間分店都得。
李華華
mailto:LiWaWa@AppleDaily.com
李華華
LiWaWa@AppleDaily.com
中環在線 - 李華華 舊文
