短炒快閃黨
2015年10月07日
港股未能攻破兩萬二大關，連日升勢終於斷纜，恒生指數開市借住美股杜指上日大升304點高開，跟住拾級而下，全日微跌22點收場，好彩國企指數報升收市，氣氛仲叫頂得住。
港股從低位20400點左右彈番上來，升到近22200點的水平，短時間彈了1800點
，上面阻力大，自然乏力想回吐，呢兩日指數回得唔多，部份炒得勁的股份回咗唔少，個勢想回吐深少少，然後先再上。
今年內地十一黃金周有長假，到昨日已經放得七七八八，來港旅客數字開始有眉目。商務及經濟發展局局長蘇錦樑透露，黃金周首五天訪港旅客上升3.4%，當中內地旅客上升4.3%，估計係受內地學生來港考試和天氣影響，整個黃金周的訪港旅客數量是否下挫，則仍有待觀察。
內地旅客有得升，雖然數字唔大，已經比想像中好，有人就質疑，入境人數中包括大批來港考試的考生，認為有水份。對於呢個質疑，中環茶友又唔係咁認同，佢話來港考試嘅學生，可以視為另類「商務旅客」，佢哋來港唔會係一日遊，一樣住酒店，有考生捱完試順便會購物，遊玩鬆一鬆，咁點解要話佢哋無消費力呢？
考試經濟 利低消費
香港考試制度公信力高，有國際認可，令香港成為考試中心。現實上，內地好多直升機父母會陪子女來港伴考，完咗就家庭遊，呢班人最唔受美元匯價強影響，雖然估計佢哋較多中低檔消費，唔太買貴嘅。無論如何，考試根本成為本地仲有競爭力的產業之一，只係唔知仲可以維持得幾耐唧。
由於黃金周來港人數好過預期，零售股炒下死貓彈。不過係咪買得過就好考眼光，現階段零售股應未可以話見底，跌得低就會有啲反彈。揀呢類股票，依家一定要睇佢資產同現金，因為寒冬未過，如果無糧草肯定捱唔到春天。
基本上，依家好多黃金珠寶股都係低PE、高息率，好多已經接近資產淨值，以現金生意來說看來幾抵買。但奢侈消費品公司係泡沫吹得最大的零售股，佢地手頭的貴租合約有排消化，這類股份的派息率未來能否維持都好難講，所以整個板塊都唔太值得考慮。
至於其他零售股，有人喜歡莎莎(178) ，貪佢派息7.4厘夠高，產品層面大眾化，抗跌力比較強。莎莎生意基礎的確比其他零售股好，但佢雖然由高位調整咗七成，市值仲有90億元，市盈率仲有10.8倍，未算係鐵底價。你睇內銀如建行(939) 都派7.1厘息，但市盈率只有4.7倍，低過莎莎一半，即係話建行盈利跌一半市盈率仲低過莎莎，雖然蘋果同橙不可比，但可見現今市道，10.8倍市盈率，以一隻盈利下跌的股份計，算做高價啦。
莎莎PE 仲係偏高
另一隻老牌零售股迪生創建(113) ，3月底止年度由盈轉虧，不過公司仲維持派息。在年結日迪生手頭有13億元現金，比公司市值11億元仲要高，呢個係佢最大賣點。不過，零售業環境受強美元影響，短期唔會有大大改善，呢類板塊暫時只可以揀啲大件夾抵食的超值股，等佢超跌，做個博反彈的短炒快閃黨，否則揸住佢睇中長線，佢彈完再跌，好易中招。
個市彈咗幾日，依家入貨最好小心啲，好似港股昨日高開315點，但已是高位所在，隨着投資者趁高減持，港股升勢大減，午後更出現倒跌135點，好彩最後力守21800點收市，收報21831點，跌22點；國企指數收報9931點，升47點，成交783億元。
陸羽仁
金融High Tea 舊文
