中環在線：細價股玩家娶維他奶後人
61歲莊友堅做老襯
■莊友堅下周與拍拖14年嘅羅琪茵（Karen）飛去意大利羅馬舉行婚禮，右圖為請帖。 《壹週刊》圖片 
每年年尾都有好多人結婚，娛樂圈有黃曉明與Angelababy拉埋天窗，財
經界都有喜事，61歲嘅細價股玩家、中南證券話事人莊友堅（Eugene）將於下周二（13日），跟拍拖14年嘅維他奶（345）家族後人羅琪茵（Karen）飛去意大利羅馬舉行婚禮。
莊友堅結婚呢單消息，都幾震撼財經界，市場一直知道佢同今年43歲嘅羅琪茵拍拖多年，不過莊友堅5年前接受雜誌訪問時自爆，自己曾經喺37歲時結婚，但婚姻只維持一年多就告終，之後佢同過前亞姐陳奕詩拍拖。
佢當時提到，雖然已經同羅琪茵拍拖多年，但無意結婚，指自己唔適合婚姻生活，感覺似被人綁住咁話。
近年亦不時傳出一啲關於莊友堅嘅緋聞，傳得最多就係前藝人陳文媛（BoBo），不過有接近莊友堅嘅消息人士就話「BoBo其實唔關事」。莊友堅年過60，忽然又願意被人綁住，做老襯，可能心態上有轉變喇。
羅馬行婚禮 馬化騰或到賀
講番下星期的婚禮，莊友堅喺金融界人脈廣，羅琪茵又係小賭王何猷龍太太羅秀茵嘅家姐、維他奶家族後人，飛過去羅馬參觀婚禮嘅賓客肯定唔少。據了解，主人家與家人𠵱家已經身處意大利，做最後準備功夫。
至於有乜朋友嘉賓？聽聞騰訊（700）老闆馬化騰係其中之一，今年中，馬化騰與許家印旗下恒大地產（3333），成為莊友堅系內股份馬斯葛（136）主要股東，可見佢哋關係唔錯，莊友堅結𥲑咁大件事，當然要飛去喇。
李華華
mailto:LiWaWa@AppleDaily.com
李華華
LiWaWa@AppleDaily.com
中環在線 - 李華華 舊文
