魚樂無窮：煲起冷門磚頭股
■磚頭股有價有市，永安可以留意。 資料圖片
潛在殼股星光（403）中期盈利大升五成至2,804萬元，較過去三年盈利總和還要多，由殼股升呢做績優股，動力打孖上，大成交一棍突破雙頂阻力，下一站直指0.7元，屆時市值都未夠4億元，依然平到震。
有傳爪哇（251）
出售灣仔大新金融中心，雖然公司已出通告否認，但大家一於少理，炒個痛快，爪哇埋單狂升25%，再創新高，連同早前成功出售柴灣物業嘅安全貨倉（237）亦一併破頂，反映磚頭股有價有市。
既然尋寶遊戲未完，今日順勢推介另一隻冷門磚頭股永安（289），一旦獲資金相中，升勢相信同樣勁抽。提起永安，大家只想起百貨公司，但物業投資先係搵真銀地方。最新中期業績顯示，物業投資溢利達2億元，佔比接近七成；公司物業遍佈香港、美國及澳洲，當中又以上環永安中心最值租，佔地35.9萬平方呎，絕對有被全幢洽購嘅誘因。
永安底子好厚︰每股NAV達49.2元，以最新價24.9元計，市賬率僅0.5倍，比起爪哇及安全貨倉嘅0.7倍，平足一條街。值得留意嘅係，公司近數月連環進行回購，屬六年來首次，雖然金額只係百多萬元，但象徵意義大於一切。再講，永安派息出名慷慨，現價息率達7厘，小注博有大動作跟尾，連息都食埋，咁筍嘅機會，市場真係越來越少。
唐牛
https://www.facebook.com/tongcow88
唐牛
魚樂無窮 - 唐牛 舊文
