渣打供股 雞肋難啃
2015年11月04日
美股繼續升，但內地股市繼續喺概念股不振下腳軟，令港股跌幅收窄。有內地第一私募基金大佬之稱的徐翔被查案，再有內情披露，主要係七、八月救市時有人涉嫌內幕交易，喺餘震下香港相關的股仔亦出現暴跌。
據內媒形容，徐案是一宗特大操縱期貨案件，涉及交
易金額超過113億元人民幣。案件涉及兩名在香港設立公司的外籍人士，他們被指非法開設多個期指戶口，買賣上海股指。雖然徐翔屬下公司對調查保持緘默，但內地傳媒就登出一張他穿白色名牌上衣扣上手銬的照片。
A股爆災後逆市大賺
報稱只有高中學歷的徐翔崛起於老家寧波，1993年以幾萬元開戶炒作。2010年成立私募基金澤熙公司後，他管理的澤熙系基金中的1號和3號，投資收益超過30倍。最神奇是，在今年6、7月間的股市波動中，徐翔管理的基金自6月15日到8月15日的兩個月中，全部逆勢增長。其中只在6月26日至7月3日出現過小幅回吐，7月中旬開始，徐翔的基金業績隨着市場反彈爆發性增長。之後有消息指徐翔在股災期間，曾就是否參與做空接受過調查。
到了8月份，內地嚴查在7月股災期間的市場操作，在職的證監會發行部三處處長劉書帆等接受調查。9月中旬，中國證監會主席助理張育軍接受調查。私募一哥當日逆市創造奇蹟，現在卻成為整個股災調查的重點。
徐翔被捕對內地其他積極炒作概念的板塊影響力大，相比他還未大舉沾手港股。不過，由他擔任主要股東的中國七星(245) ，就確認徐翔被查和失聯，股價因此急挫，一度由前收市的1.29元插到0.72元，收市報0.94元，跌27%。
今年8月落實投資七星的中國民生投資副主席史玉柱，於微博發文稱「以前我沒聽說過徐翔。兩三個月前中國民生投資入股香港七星，徐是跟投者。我也被邀請跟投了一點。之後在一次飯局上才認識徐。徐個人出事，不會影響中民投和我們投資七星進程。」史玉柱言下之意是叫大家放心，有佢頂住咁話。
50天線有少少支持
中國民生投資早前按每股0.19元認購合共263.16億股中國七星股份，有6個月禁售期，總金額50億元，取得公司擴大後股本71%股權。本來公司似乎係想有大動作，現在被案件窒住晒，呢啲亦係炒概念股的風險。
港股雖然一度回升超過300點，但跟住A股受壓下，尾市升勢放緩，恒生指數收造22568點，升198點；國企指數收報10283，升43點，成交縮至646億元。由於成交唔大，指數容易波動。內地似乎一邊打大鱷一邊護吓盤，所以頂住唔係跌得太甘。
恒指在22266點的50天線搵到少少支持，若然企得定，可以在本月下旬國基會傾人民幣是否加入作特別提款權貨幣時，上一上高位。
另一單消息係渣打(2888) 傳咗一段時間嘅抽水大計終於公佈。渣打表示，截至今年9月底止的第三季虧損令人失望，除稅前虧損1.39億美元。
集團同時宣佈7供2，集資約51億美元(約398億港元)。本港股東供股價為每股55.6元，較今日上午收市價87.55元，大幅折讓36.5%。估計在供股後，普通股權一級資本比率將由11.5%增至約13.1%。
由於供股有啲雞肋味道，消息出籠後，渣打股價應聲急插，午後低見79.9元，收報82.65元，跌3%。幾年前新興市場強勁，渣打係威係勢，2007年股價高見261元，2010年見第二個高位245元，近幾年新興市場回落，渣打也走晒樣，如今以55.6元供股，等如高位唔見咗79%，真有恍如隔世之感。
環球銀行業前景唔靚仔，銀行息差又窄，美國唔似可以大幅加息，跟供都要有心理準備，要坐較長時間。否則不如等反彈沽出供股權，留番筆錢明年第二季出埋全年業績時等股價再插，買平貨好過。
陸羽仁
金融High Tea 舊文
