魚樂無窮：大時代真係咁爽？
■今年大時代下，贏大錢嘅戰友唔多，多數只
係贏粒糖，唔少更加係一手蟹貨。 劇照
一年將盡，輕鬆啲，不談冧巴，回顧與展望一番。
今年最令人回味是甚麼？問10個有11個都答大時代，應該係，除非唔係，但事實係咪咁精采？根據非正式統計，今年贏大錢嘅戰友唔多，多數只係贏粒糖，唔少更加係一手蟹貨，不知何年何月鬆綁。點解嘅？點解嘅？從來都係心雄累事，不是嗎？大時代第一日，掟貨嘅人肯定多過買貨，過多幾日，發覺唔對路，開始搶番貨，有錢贏喎，越買越大，睇三萬點、四萬點……結果？未到29000點已無情。
「你都係唱好嗰個喎！」見好睇好人之常情，最緊要迷途知返。乜嘢令我狠心分手？倉位水平是也！講過不下數次，每日update住倉位，同每日睇通告同樣重要，發現盈利水平跌到去警戒線（例如由高位跌兩成，因人而異），已經唔係揀股出現問題，而係倉位太大及市況急劇轉差，此時此刻，如果不壯士斷臂，肯定嘔足十九幾両血。畢菲特第一條原則，就是永遠不要輸錢，股神都咁講，你點可以唔跟。
曾經係星級分析員、人稱民企之父張化橋講過，做預測係儍事，唐牛深表認同，尤其現今市場千變萬化，如果乜都畀你估到，就唔使等埋發叔啦。一句到尾，明年繼續長短棍策略，長揸必選長建（1038），有升有息，短炒呢？繼續睇實本欄啦！祝戰友新一年贏到開巷！
唐牛
https://www.facebook.com/tongcow88
唐牛
魚樂無窮 - 唐牛 舊文
來源 source: http://hk.apple.nextmedia.com
