完美風暴
2016年01月21日
前晚外圍股市好好哋，美股雖然無話大升，但杜指都升28點，重返萬六點樓上，點知港股一開市就插，市場擔心嘅係港匯再軟，有可能加息。拉遠啲睇，環球投資市場都郁，紐約期油跌穿28美元一桶，台股低收2%，韓股跌2.3%，由於日圓被扯
高，日股插夠3.7%，市場災味漸濃。家外資開始關注埋印度盧比會唔會學人民幣貶值，搞出個金磚四國的完美風暴。
盧布日股吹起拋風
印度股市呢個星期唔靚仔，《巴隆氏》網站就提問，印度會唔會喺人仔身上學到嘢，搞吓貶值呢？Kotak證券分析員就話會，調低盧比匯價預測。該行認為，新興市場貨幣受人行影響仲大過聯儲局，因為這些地區以出口同商品為主，同內地關係密切過同美國。人民幣貶值有可能會掀起新興市場的競相貶值潮。
呢排外資對新興市場愈睇愈淡，資金有回流美歐跡象，故此外圍唔跌唔代表中港股市會好，呢個亦係早前我講美股跌好過唔跌的原因。中國係亞洲大哥大，佢股跌匯跌一樣波及鄰近主要市場。日股唔覺唔覺都由去年6月份高位跌咗21%。
港股勁插，比去年4月高位跌34%；而中國帶頭在人民幣匯價拉閘，上證比去年6月高位跌咗43%，可以話升得急跌都快。昨日內地股市全日下跌，滬深兩市跌逾1%，上證指數失守三千點大關，收報2976點，跌31點，略逾1%。恒指收報18886點，勁挫749點，撻足3.8%，創2012年7月22日以來新低；國指收報8015點，重挫362點，仲跌夠4.3%，創2011年10月2日以來新低；低處未算低係紅籌指數收報3357點，下滑161點，跌成4.6%，大市成交金額923億元，跌咁多成交都唔過一千億元，說明敢接貨者唔係咁多。
藍籌中港交所(388) 插5%，收報168.1元，對呢隻股都係嗰句，未算跌得夠多；而呢輪的強勢股友邦保險(1299) 都重挫4.8%。
習慣上，港股係同美股拍住上或至少同一方向。不過，家呢個步韻可能已經改變，皆因中港股市跌，係因為美元強，人仔弱，故此美股愈強，可能愈吸引資金流走，反而美股如果被人仔拖散埋，聯儲局放慢加息步伐，咁港股仲有機會穩定下來，但要發生呢個情況需要一個過程，短期未必會出現。
港元走弱係股市劇毒。喺熱錢關注新興市場匯價下，港元在跌穿7.8的中間價下繼續尋底，昨日見7.82，家焦點係幾時觸及7.85的下限波幅，屆時金管局就會買港元、沽美元，拆息應該會推高，藉以吸引資金留番喺香港。港元軟弱是股市毒藥，利息一升股市難搞，港元匯價見7.85只是遲早問題，未知是一步到位，還是反覆下插。不過整個亞洲匯價下挫，短期會吸引各國政府出招挺匯，造成市場波動，搞不好深跌時又會突然來個大反彈，令市況更難玩，即使短炒者追沽風險亦不低。
股民留定幾「飛」子彈
港元港息開始成為炒家議題，摩根大通發表研究報告指，過去港元下跌，令人憂慮資本外流而引致香港銀行同業拆息(HIBOR)抽高，升逾過往徘徊在0.4厘的水平。報告仲話，因應H按較P按優惠約0.2%，造成自2014年起H按十分受歡迎，相信目前80%新按揭都是使用H按，相信這批人士將是首批受息口上升影響的人士，但該行相信，情緒問題將較實際更具影響力。
由於息口升到幾高至足以吸引資金留守港元，家係未知之數，故此息口敏感股好似地產股就紛紛碌低。如果按照呢個時序表，家個浪仲未正式衝到，所以睇長線的股民就算要入市，都唔好一注盡出，最好留定幾「飛」子彈等執平貨。
陸羽仁
金融High Tea 舊文
來源 source: http://hdfin.stheadline.com
