中環在線：業績報告引用歌德
純官都驚訝「乜嘢名句呀？」
■鄭家純（右）被記者問起歌德名句𢱑曬頭，鄭志剛即時喺耳邊提醒。 黃耀興攝 
新世界（017）份業績報告，舊年喺英國「請咗」狄更斯出嚟，引用《雙城記》名句「這是最好的時代……
」，來做主席展望嘅開場白。今年就轉去德國搵大文豪、《浮士德》作者歌德「出山」，在業績公告中引用其名句：「生命當屬生存者所有，生存的人應為改變時刻做好準備。（Life belongs to the living, and he who lives must be prepared for changes）」，指集團未來要變陣適應新挑戰喎。
大家一直好想知道，主席鄭家純咁忙，點解有時間刨咁多西方文學巨著，唔通佢「吳克儉」上身？噚日開業績會嗰陣，有記者就問純官點解會引用歌德名句，係咪對前景好擔心呢？點知純官反應好大，話「乜嘢名句呀？你再講多次，我講嘅名句？」跟手佢笑住咁𢱑一𢱑頭，個記者再講多次歌德個名，純官就：「嚇？」一聲叫出嚟。
鄭志剛耳邊提示
坐係隔籬嘅阿仔、即執行副主席鄭志剛都忍唔住笑咗出嚟，不過佢無坐喺度食花生，即刻喺佢耳邊「提場」。唔知純官係咪聽唔清，鄭志剛唯有重複幾次，好似唸經咁：「歌德嗰個呀……歌德……歌德呀……」，仲特登拎起份業績，指返嗰句畀阿爸睇。
純官果然功力深厚，睇完嗰句嘢，淡淡定咁話時代變，做生意自然要適應啦。事後問番佢有冇睇過歌德著作，純官都相當坦白話冇，唔似得高官話自己一日睇好多本書。純官話其實呢啲嘢都係公關寫，照番佢大約個意思，搵啲名句放返喺展望入面。呢啲公關災難，公關自然要食咗佢啦，明白嘅。
李華華
mailto:LiWaWa@AppleDaily.com
李華華
LiWaWa@AppleDaily.com
中環在線 - 李華華 舊文
來源 source: http://hk.apple.nextmedia.com
