魚樂無窮：盈警照升有景轟
傳統智慧告訴大家，盈警股必定拖累股價，能夠反地心吸力嘅，一係假盈警，一係有動作跟尾。點解？因為資金永遠唔會講大話！
香港華人（655）日前宣佈，由於新加坡上市嘅合營企業OUE，錄得物業、商譽減值虧損，以及出現融資成本，預期須分佔虧損不少於5億元。翻查資料，香港
華人中期盈利達3.5億元，按此計算，全年見紅機會不低。心水清嘅戰友，應該一眼望得出，所謂虧損全屬會計項目，並不影響現金流，故香港華人僅調整一日即見底，近日更大成交破位，靚仔到暈。
香港華人於中國、澳門及新加坡擁有多個物業發展及投資項目，另持51%澳門華人銀行股權，及全資擁有力寶證券，業務瓣數極多，證券業務最值憧憬。近年內地證券行借殼南下多如繁星，有價有市，只有一聲令下賣盤，買家肯定街頭排到街尾。難道春江鴨收到風，所以密密吸貨推高股價？我唔知，但集團每股NAV達5.1元，市賬率得0.3倍，絕對係刀仔鋸大樹佳品。
唐牛
https://www.facebook.com/tongcow88
本欄逢周二、四刊出
唐牛
魚樂無窮 - 唐牛 舊文
來源 source: http://hk.apple.nextmedia.com
