中環在線：羅康瑞：特朗普儍㗎！
「如果當選美國總統 我要移民火星」
■羅康瑞（左）和特朗普之前有瓜葛，怪不得羅康瑞咁唔支持特朗普。 設計圖片
今日「超級星期二」係美國民主共和兩黨總統提名戰關鍵一役，共和黨富商參選人特朗普（Donald Trump）暫時領先主要對手，多年前同特朗普交過
手嘅貿發局主席羅康瑞十分關心，佢形容特朗普「真係儍㗎！」如果最終當選，佢自己要移民去火星咁話！
特朗普曾告羅康瑞
話說特朗普曾經缺水，1994年搵羅康瑞、新世界發展（017）主席鄭家純等港商，投資喺佢位於曼克頓上城區嘅發展項目，特朗普佔三成，其餘七成由羅、鄭等人持有。後來地產市道好轉，羅、鄭等人喺2005年將項目以137億元賣畀基金，特朗普冇耐就告佢哋，話佢哋冇事先通知、賣平咗，特朗普最終敗訴，雙方之後亦冇乜兩句。
羅康瑞噚晚出席貿發局晚宴時，講起特朗普，重提舊事，又透露有日收到特朗普打電話畀佢“I don"t do any property business anymore（我唔再做地產生意）”，羅康瑞聽到都冇佢咁好氣，只回咗一句“congratulations（恭喜）”。
特朗普𠵱家氣勢如虹，羅康瑞都讚佢識得利用傳媒去造勢，但佢估計，「美國啲人咁醒，冇理由揀特朗普做總統」，如果係，佢就要移民火星喎。但講到移民火星，羅康瑞支持嘅梁振英搞到香港社會𠵱家嚴重分裂，本土派人士選立法會都有幾萬人投票支持，要移民火星嘅，會唔會係香港人先呀？
李華華
mailto:LiWaWa@AppleDaily.com
李華華
LiWaWa@AppleDaily.com
中環在線 - 李華華 舊文
來源 source: http://hk.apple.nextmedia.com
