智取大市：反彈浪過後新攻略
■上周五主板成交縮到唔夠600億元，反映動力明顯不足。 李潤芳攝
上個星期五，主板成交縮到唔夠600億元，反映動力明顯不足。上一期講到成交縮減之下，升勢好大機會暫告一段落，皆因H指要企穩9000呢個重大阻力位，冇番咁上下交投，點接得住陳年蟹貨區。發展到上周
五，亦見到資金由強勢周期性股份，流入一批非周期性股份、低殘中低檔零售股同龍尾細價股，睇嚟大戶都轉為審慎，唔同你狗衝。
無論劇本如何走，4月餘下時間應該係測試承接力嘅時間。點為之強？4月底明顯高於20800收市，月線圖成功出現兩連陽。觀乎2008年金融海嘯同埋2011年歐債危機，跌市途中都未試過兩連陽，如果今次有月線兩連陽，似乎形勢開始好轉。若5月至6月開始見到港股單日成交維持800億、900億元，H指企穩9000點樓上，步履呈向上趨勢，就能夠確認出現新一輪升市。情況有如2012年8、9月一役，進入非常好炒嘅日子。
點為之弱？如果兩周之內，恒指跌破周線大陽燭起點20300或保歷加中軸，就抵銷周線大陽燭嘅利好訊號而轉弱，同時亦宣佈月線圖未能形成兩連陽，5月甚至有機會下試18300點低位。觀乎近日少有賣殼消息，已公佈咗賣殼嘅deal又一再延遲，反映大陸資金唔易流出，困局未解。美金走向同埋走資能否紓緩，成為後市關鍵。
晉佳
https://www.facebook.com/advanceguy1/
晉佳
智取大市 - 晉佳 舊文
來源 source: http://hk.apple.nextmedia.com
