智取大市：博港交所的「後裔」
■港交所突破195元之後，氣氛維持理想，有能力挑戰200元。 資料圖片
近排恒指chok住嚟升嘅走勢，經常令人錯判短線形勢，狼來了嘅調整喺周一出現，但尾市突然有春江鴨追貨，跌勢大為收窄，果然周二形勢又好番。
有信心而睇啱趨勢者，永遠贏得多，如果近期揸強勢
股揸得實，就最有運行。然而，近期每次冚檔確係嚟得突然，如果真見頂，亦可能來得突然，難免斬走一部份持貨利潤；如果持貨少，呢一刻後知後覺決定買貨揸中線，逆轉起上嚟更猶如割一刀。折衷嘅方法，就係每次趁短暫嘅好景去進攻，見步行步再望清形勢，同時亦有機會搵食。恒指以小時圖睇，周二即市成功守住保歷加通道中軸，然後收市前一個鐘又有資金追貨，價量齊升，成交比起周一最後一粒鐘還要多，證明有更多人賭緊美股夜晚開香檳。呢個欄喺報紙見報時就知道美股夜晚表現，假如開大嘅話，周三港股當然炒得激過周二，即市形勢仲要係非常好，朝早就要搵嘢趁早追。
春江鴨大多數時間都賭得啱啲，因為佢哋比散戶更叻豬。不過唔使諗太多，只爭一夕長短，見美股再升，周三朝早又可以博耀才（1428）同英皇證券（717），皆因港交所（388）發力突破195元之後，睇小時圖，一直保持喺195元樓上橫行，氣氛維持理想，肯定有能力挑戰200元，著同一條褲嘅耀才同英皇證券圓底兼守住保歷加中軸，似乎有運行。
晉佳
https://www.facebook.com/advanceguy1
晉佳
智取大市 - 晉佳 舊文
來源 source: http://hk.apple.nextmedia.com
