投資先機：置業非唯一目標
■高樓價及昂貴租金扼殺年輕人嘅創新思維同創業理想。 資料圖片
成日聽到坊間一句說話：「自住樓唔怕跌」，其實呢句說話既不負責任同時又有誤導成份，令不少心急置業人士做了錯誤的人生決定。有人可能覺得10年儲80萬元上車好minor，但往後供款年期長達25至30年
，所賠上的人生夢想及青春就一啲都唔minor。高樓價置業賠上10年青春。以400萬元樓價承造九成按揭作計算（首期：40萬元，按揭息率2.5%，供款年期30年），每月供款約為14,000元；若樓價下跌到300萬元（首期：30萬元，按揭息率2.5%，供款年期20年），每月供款同樣為14,000元。以上例子說明，樓價下跌，每月供款金額一樣，但可以提早10年時間把物業供完，呢10年可以做到好多嘢，一啲都唔minor。
傳媒用勵志故事方式報道買樓經歷，又標榜上樓置業者係成功人士，令一班滿腔熱誠的年輕人視買樓置業係唯一奮鬥目標；另一方面，地產經紀用15萬元就可以做業主作廣告宣傳，但對於長達25至30年的供款年期及加息風險卻隻字不提，咁嘅宣傳手法係咪有違反商品說明條例之嫌？
香港社會最缺乏係創新思維（idea），歸根究柢高樓價及昂貴租金已經扼殺咗唔少香港年輕人嘅創新思維同創業理想。年輕人其實唔值得為咗一個物業束綁自己嘅夢想、創作能力及創業理想，買樓置業唔係人生嘅唯一目標，亦唔係最終目標。如果有一日有人同你講，「買樓怕咩？自住樓唔怕跌」，請禮貌地回應一句：「你呢句說話難聽過粗口啊！」
窮小子
https://www.facebook.com/poorguyfans.hk
本欄逢周三刊出
窮小子
投資先機 - 窮小子 舊文
來源 source: http://hk.apple.nextmedia.com
