美股一踩 即穿二萬
2016年05月13日
五月淡市，乃源於老外炒股智慧Sell in May(5月沽貨)，所以美股逼近杜指一萬八千點，就有啲破關乏力，杜指周二升咗兩百點，上日插番晒落嚟。
華爾街家關心企業能否保持盈利增長。娛樂巨企迪士尼宣佈季度盈利，扣除特殊項目
的每股盈利為1.36美元，不及市場預估1.40美元。營業額雖由124.6億美元增至129.7億，但不及預期的131.9億美元目標。佢盈利不及預期為兩年來首次，呢個係蘋果成績表唔好後，另一間大企業受質疑。公佈後，迪士尼股價一度跌近半成。
大藍籌業績難討好
迪士尼業績差，似乎係一個環球現象，媒體和旅遊消費都唔係好掂。迪士尼業績倒退皆因主要旗下ESPN體育電視網絡的廣告收入和訂閱用戶數量均下降，主題公園和消費部門同樣遜於預期，要靠今年上海新迪士尼樂園開張救命。
坦白講，市場對迪士尼嘅批評有啲苛刻，其實佢嘅經營都做得幾唔錯，尤其係電影投資，電影業務季度營收增長咗22%至21億美元，主要得益於《星球大戰：原力覺醒》和動畫片《瘋狂動物城》票房大賣。
家環球大藍籌業績難討好，唔係大增長的時代，CEO做到索氣。迪士尼做得唔錯，但仍然俾市場插，反映美股現在普遍狀況，就係估值比較高，所以業績做得好已經係應該，分析員仲要捐窿捐罅搵吓有乜隱憂，呢啲就叫做高處不勝寒，美股係咁，港股都係咁啦，上月尾彈到21654點就覺得你升好多，搵位隊你落嚟。
五月港股跌多升少，美股踩多腳下，恒指終於跌穿20000關，收報19915點，下跌139點；國企指數收報8413點，跌29點；紅籌指數收報3534點，成交金額539億元。
港股俾中美股市牽引，大市跌穿兩萬點關後，應該開始有啲承接力，喺呢啲市況，個股表現會差別好大，由於經濟氣氛唔算太好，資金會傾向流向生意較穩定的公司，所以公用股會有錢泊入去，景氣敏感股就可能仲會探吓底，行內大公司就會增加手頭現金，迎接逆境。
電能唔派特息估得到
呢兩日外電就引述消息人士，話長和(001) 旗下赫斯基能源計劃出售一系列資產籌集10億加元資金，除了已於周二公佈、涉及5.95億加元的薩斯喀徹溫省西南部資產出售，將會進一步籌集4億加元資金，公司為此將再出售五個石油探勘及生產項目，反映能源公司要努力保溫，繼續捱過寒冬。
同系另一隻股電能(006) 派發特別中期息夢碎！電能宣佈，董事局經考慮三個項目後，認為於目前保留公司對將來收購的財務能力，乃符合公司及其股東之整體利益。因此，董事局決議在現階段不會派發特別中期息，但可視乎將來發展情況再作考慮。電能考慮投資的項目包括：集團已參與一項位於加拿大的中流設備、油管資產及相關基建的大型投資合資項目；一項非常重大項目的投標程序已接近最後階段；以及已開始另一項非常重大項目的工作。
前年電能分拆港燈時(2638) 時，曾講過若1、2年後，未見有合適大型項目可以投資，會將分派分拆港燈套現所得的資金。電能手持680億元現金，有證券行估佢派5元、甚至10元特別息。
但陸羽仁睇佢早前投資加拿大油管資產時，已提醒大家佢可能不派特別息，結果真係咁。電能昨跌2.7%，收74.9元，唔派特別息股東就唔鍾意啦，最近隻股炒上81元高位後回吐，短期仲要回。未來有無力上，真係要睇佢部署投資的「非常重大項目」係唔係好嘢啦。
陸羽仁
金融High Tea 舊文
來源 source: http://hdfin.stheadline.com
