Money Walker：紅酒價格看經濟
曾幾何時周街都有人講紅酒投資，但隨住酒價2011年見頂後，已少咗好多人再提。不過唔知點解，紅酒價格今年初開始又起死回生。
Liv-ex紅酒100指數——代表二手市場上最多人尋找嘅100支佳釀價格變化嘅指數，自去年12月低位起
計累升6.77%。呢個中單位數升幅當然未算搶眼，但係該指數3年冇升過、而且橫行多時嘅情況下，有呢個升幅已經好叻仔。
內地經濟數據今年初開始好轉，Liv-ex紅酒100指數亦咁啱喺同一時間好轉。有人話紅酒指數發揮到經濟指標作用，指數升即經濟好轉，筆者就反而覺得，紅酒指數係內地有錢人經濟信心與內地流動性氾濫程度嘅另類指標。
原因好簡單，有錢人對經濟前景信心大啲，自不然開支酒都開得闊綽啲，尤其是係內地嘅有錢人，因為中國係波爾多紅酒嘅最大入口國，佔波爾多紅酒整體出口量兩成。
至於酒價同流動性之間嘅關係亦好易理解，當連大蒜、大豆、豬隻等普通食材，喺內地都因為流動性氾濫，而導致價格於今年大升，本身被視為投資工具嘅紅酒，當然亦難逃一升。
去年初一項研究發現，本港出售嘅紅酒較環球其他市場平均賣貴近兩成，尤其是被著名酒評家Robert Parker評為滿分嘅紅酒，以及品牌名字夠響嘅紅酒，較其他地方賣得更貴。不過研究亦發現，情況近幾年有所緩和，可能係因為內地人對於紅酒嘅知識有改善。
筆者就覺得中央打貪同大陸經濟轉差，都影響到內地人喺紅酒市場嘅消費力，間接減慢酒價上升。
El.
http://www.facebook.com/moneywalkerhk/
本欄逢周二、五刊出
El.
Money Walker - El. 舊文
來源 source: http://hk.apple.nextmedia.com
