魚樂無窮：
旭日國際靜待東風
■旭日國際上月宣佈供股結果，最後獲逾九成股份接納。圖為主席蔡志明。 資料圖片
炒股最緊要啱timing，否則買破頂股都可以輸錢，今日推介嘅旭日國際（393），集天時地利人和於一身，喪炒只時間問題。公司3月宣佈供股，二供一集資4.6億銀，供股價0.9元，上月
中宣佈供股結果，由於股價大部份時間企穩0.9元之上（只得公佈翌日曾稍為穿價），最後獲92.1%股份接納，餘下超供部份，更獲得逾7倍認購。
大股東供股原因不外乎兩個︰一，集資大展拳腳；二，低價增持股份。前者嘛，旭日講明轉型搞證券業，更引入恒豐證券老闆張華峰，擺明食大茶飯，某程度上算是深港通概念股。後者供股反應熱烈，增持如意算盤打唔響，唯有真金白銀喺條街掃貨。翻查SDI資料，大股東在供股完成後，連番入市增持，誠意多到一地都係。
秤秤身家，旭日最新市值近15億銀，供股後手頭現金達10億銀，名副其實現金牛。現價只較供股價高出一成，上望空間卻是無限遠，如此低風險高回報機會，實在可遇不可求。炒作東風幾時嚟？噚日剛剛除息，4.3仙息袋袋平安，話唔定就係大型工程起動之時！
唐牛
http://www.fb.com/tongcow88
本欄逢周二、四刊出
唐牛
魚樂無窮 - 唐牛 舊文
來源 source: http://hk.apple.nextmedia.com
