中環在線 - 李華華 2016年6月7日
中環在線：七哥搬舖去酒店
富豪舒服開餐
■家全七福新店噚日正式開張大吉，收到各方祝賀；圖右為「七哥」徐維均。
「富豪飯堂」福臨門前老闆「七哥」徐維均2013年自立門戶，喺灣仔群策大廈開設「家全七福」，由於位置麻麻哋，七哥一直想喺灣仔搵番個大舖，最終決定搬去華美粵海酒店，噚日正式開張大吉。
早有聽聞，家全七福之前開喺群策大廈，流失唔少富豪客，事關嗰度冇私家電梯，要班富豪同普通人逼埋同一部電梯去食飯，幾好食都係假喇。福臨門之所以係富豪飯堂，華置大股東劉鑾雄都經常幫襯，除咗食物質素有保證，另一個原因就係位置好，富豪們可以喺正門口落車，行兩步就直入電梯上樓食飯，守門口嘅侍應仲會睇情況截住其他客，等富豪有一等待遇。
月租40萬 唔驚經濟差
七哥噚日同華華傾偈都承認，之前店舖位置冇咁好，又分開三層，唔及新店一層過有8,000平方呎咁好用。兩間舖嘅租金差唔多，月租約40萬元，不過七哥有的是錢，最緊要係租到靚舖，吸引番班富豪客去幫襯。
雖然𠵱家經濟與股市表現疲弱，但七哥滿有信心，指經濟差對富豪熟客冇乜影響，食開鮑參翅肚嘅熟客會繼續食。梁智鴻醫生與嘉里建設主席黃小抗係七哥粉絲，噚日開張都有捧場。
李華華
mailto:LiWaWa@AppleDaily.com
李華華
LiWaWa@AppleDaily.com
中環在線 - 李華華 舊文
來源 source: http://hk.apple.nextmedia.com
