焗買防守股
2016/06/23 09:30:10
網誌分類: 經濟
英國脫歐公投前夕，股市牛皮觀望。美股早段跟隨歐股造好，但始終受制於標普500指數2100點的心理關口，只差唔夠1點就掉頭回落，以跌市收場，不過跌幅輕微，標普500指數跌3點，收2085點，杜指跌49點，收17780點。
美股呢兩日牛皮拉鋸，窄幅上落。反映投資者在英國脫歐公投前夕，表現有點步步為營，睇股票恐懼指標VIX指數昨日急抽14.6%至21.17的超過4個月高位，投資者對英國脫歐問題帶來的不確定性，可見一斑，一切都要等歐洲方面大局既定至算啦。
對於聯儲局的加息去向，摩根士丹利估計聯儲局今年只會在12月加息一次。 大家不妨睇睇大摩在等待聯儲局加息呢段期間，如何部署？
大摩首席美國證券策略師Alan Parker表示，會在投資組合中加入派息高的防守性股份，作為平衡，即使這類股份的價錢已經比較貴。防守性股份當中，Alan Parker在組合中會配置較多公用股和可選擇性消費品股，較少配置必需消費品股。
在利息較低的時候，買防守性股收股息，勝過買債券，因為回報比較高。對於銀行就唔係幾好啦，市場上息差太細，銀行的借貸活動就賺唔到錢。不過，大摩的投資組合卻配置唔少銀行股。Alan Parker解釋，主要原因係公用股與金融股的關聯性不大，所以分散投資減低風險。
他表示，如果你賭利息回升，組合內沒有防守性股份，卻有一大堆金融股，往後的日子，你只能祈禱。又或者覺得防守股已經好貴，唔買，組合內只有很少飲料股、家居用品股、煙草股、食物股、公用股和電訊股，如果息口唔回升，這樣的非防守股組合，將會跑輸大市。
在大市前景唔明朗，好似呢段時間咁，要防守性股份確係唔錯的選擇，不過，要留意的是，防守性股份一般而言在市場比較波動時的表現會較好，因為投資者買入防守股避險，今年以來，市場受到可能加息的憂慮，美國以至全球經濟可能衰退，英國可能脫歐等影響，人人湧去買防守性股份，公用股迄今累計升了16%，係標普500指數表現最好的板塊。
但當大市好似今年2月中由低位回升，大摩這種平衡組合的回報率就唔係幾吸引啦，基本上會大幅跑輸大市。因為大市在一段時間內只升不跌，波動的幅度大幅收窄。
大摩的看法相當典型，令收息防守股愈來愈貴，雖然美國今年好可能只加息一次，但防守股續升，慢慢就變得太貴啦。
陸羽仁
回應(0) 我想回應
陸羽仁 BLOG 舊文
來源 source: http://blogcity.me
