Money Walker：
英國留歐追咩股最值博？
■英國脫歐成真的話，美國分分鐘係講減息而非加息。 資料圖片
港人好少留意外國政治新聞，因為香港嘅政治新聞已經夠曬精彩，最新係有人愛國愛到自願返大陸圖書館做義工，但英國脫歐呢單嘢再忙都侷住要follow。因為對於中港
市場，筆者相信除個別在英國或歐洲業務較重嘅個股會受實質影響外，英國脫歐仲有好多間接影響。
第一，係避險情緒升溫累及人民幣滙率，多間大行都預測英國脫歐會引發人民幣兌美元走弱，不過有分析指人行屆時會入市托人仔，所以唔使太擔心人仔會因而崩潰，再度引發A股股災。
第二，儲局主席耶倫之前親口承認咗，脫歐係其中一個加息考慮因素。換言之，脫歐發生意味美國低息期會延長。
但筆者認為，無論英國脫歐與否，美國利息都唔會加到幾多口，理由係美國今個經濟周期最輝煌嘅日子已過，今輪加息周期好大機會已步入中段甚至尾聲，頂盡再加多一、兩次息就要收工，聯邦基金利率本加息周期內嘅高位，好大機會唔超過1厘，加息預期最快幾個月內就會完全消散。咁當然，英國脫歐成真的話，美國下一步更分分鐘係講減息而非加息。
筆者覺得現時開始部署定美國低息受惠股同弱美元受惠股，比起繼續追入脫歐受惠股更加值博同穩陣，因為無論英國留歐定脫歐，筆者都相信美國呢個低息期會長期延續下去。如果周四嘅公投結果係脫歐，市場會立即開始反映美國長期維持低息期嘅睇法，相反如果公投結果係留歐，市場就要遲啲先反映到低息期長存嘅睇法，但筆者估計最快幾個月，最長亦不出一年，市場就會開始反映美國加息周期結束嘅觀點，長揸者不妨諗諗點部署呢類股份。
El.
http://fb.com/moneywalkerhk
本欄逢周三刊出
El.
Money Walker - El. 舊文
來源 source: http://hk.apple.nextmedia.com
