深港通適宜短炒
2016年06月24日
美股升勢暫竭，未影響港股連升，皆因脫歐已經炒完，家主場轉炒深港通，呢樣嘢乃中港股市獨有之概念，炒幾耐同點樣炒同外圍無直接關係。
臨近投票，留歐派出盡全力護航，大孖沙紛紛開腔，預測一旦脫歐英鎊至少跌兩成。由於結果將會塵埃落定，外圍借呢個概念
再炒上空間已經唔大，估計英國真係留歐嘅話，個市升勢唔大，甚至可能回吐，一旦脫歐就反而會插一鋪。
脫歐炒作準備散水
港股昨日仲係你有你公投，我有我炒深港通，結果大市連升五日，累飆830點。恒指收報20868點，升73點；國企指數收報8785點，漲21點，成交只有540億元。市場相信英國「留歐」機會大，英鎊兌美元曾創今年新高，帶挈渣打(2888) 升1.27%，造63.8元；匯控(005) 升0.99%，造50.8元；保誠(2378) 升2.67%，造154元；長和(001) 系幾隻有進帳。不過最勁都仲係「深港通」相關股份，海信科龍(921) 升揚4.25%，造3.68元；東北電氣(042) 升2.6%，造2.76元；東江環保(895) 漲3.34%，造13元。
個市呢期醒過外圍，皆因大家炒炒深港通。專家話若然機制開通，資金會北上多過南下，不過，最近大家睇到滬港通南下資金逐步增多，有理無理就炒吓啲低水H股，同埋內銀，仲有就係隻匯控(005) ，匯控今個星期反彈似模似樣，除咗話因為脫歐陰影漸除，估計「大媽愛大象」都係一個因素。
大媽愛大象，皆因佢係內地所無嘅跨國銀行，資產唔係人民幣，對內地投資者有分散風險嘅好處，而且仲係高息。匯控資產主要喺美英，好處當然係無咁受內地同人民幣匯價影響，但佢喺呢啲地方被人罰款當食飯，呢個就未必係好處，所以如果貪高息，有啲人寧願買番內銀股。四大內銀股嘅龍頭工銀(1398) 家有6.3厘息，建行(939) 有6.5厘，中行(2388) 同農行(1288) 都有6.7厘。
大行發掘電池金屬股
對於好唔好買內銀股，陸羽仁覺得睇市盈率同息口，內銀都算有防守性。不過，買唔買就要先睇大氣候，家個市炒作緊深港通，但呢樣嘢唔似會一口氣炒落去，內地經濟仲係要調整，短期唔會大上，股市好難偏離實際因素狂飆而上，所以炒內銀係搵吓快錢，心態應係宜短不宜長。
電動車大熱，比亞迪(1211) 宣佈計劃夥拍青海鹽湖及深圳市宏達，成立合資公司從事鹽湖資源綜合利用產品的開發與加工及銷售，瑞信發表報告，睇好上述交易。報告指出，新合營公司分別由比亞迪、青海鹽湖及深圳市宏達同實業持有48%、49.5%及2.5%股權，新合營會持有青海鹽湖佛照藍科鋰業51.42%股權，該公司為內地碳酸鋰主要製造商，碳酸鋰為鋰電陰極和電解質主要原材料。合營入股後，計劃擴大青海鹽湖佛照藍科鋰業產能至3萬噸，並每年供應38GWH電池，而瑞信估計比亞迪2019年電池產能會擴至34GWH，交易有助比亞迪業務進一步垂直整合，同時有助集團削減成本。
講起買嘢收購，洛陽鉬業(3993) 早前披露計劃以不低於3.17元人民幣配售A股集資185億元人民幣，用作收購兩項目，其中95億元用於收購巴西鈮和磷酸鹽業務，85億元作收購剛果銅鈷業務。呢幾類金屬部份係家搞新能源汽車所需金屬之一，中金發表報告，認為洛陽鉬業(3993) ，未來將成為集銅、鈷、鎢、鉬、鈮和磷六種金屬於一身的綜合性礦業公司，盈利能力大幅提升。洛鉬A股股價高H股好多，佢由去年高位2.7元插落嚟，再由低位0.99元反彈咗唔少，昨日收報1.76元，升咗1.7%。
陸羽仁
金融High Tea 舊文
來源 source: http://hdfin.stheadline.com
