港鐵派特息透支未來
2016年07月13日
英國繼戴卓爾夫人後，將會出現第二位女首相文翠珊。消息帶動英鎊反彈，美歐股市受惠英國減息憧憬向上，帶動港股重上兩萬一。
英國首相卡梅倫舉行脫歐公投，佢嘅老同學兼老友約翰遜陣前倒戈支持脫鈎，結果爆出隻黑天鵝。本來選民揀咗脫鈎，
約翰遜應該坐正做首相，點知佢又畀盟友高文浩跣一鋪，結果益咗支持留歐但表現較溫和嘅文翠珊，成為大黑天鵝誕生出來的小小黑天鵝。文翠姍以退為進保持低調，結果喺脫歐、留歐激鬥下成為最後贏家。佢同歐洲關係較脫歐派為好，成為短期利好英鎊的因素。
雖然好多人質疑英國選民公投時投錯票，但英國脫歐有52%民意授權，文翠珊好難推翻呢個決定，佢亦話明自己唔會尋求推翻決定。喺英國決定退場下，歐盟唔會畀佢有好日子過，新鐵娘子點樣面對艱難時期，考驗依然好大。
女首相上場利英鎊反彈
凡事有輸家都會有贏家，正如卡梅倫之失，成為文翠珊之得。有中環茶友話，脫歐派係公投勝出係商界同金融界嘅一場滑鐵盧，佢哋雖然大意失荊州，最後仍然阻止咗脫歐派上場，算係輸咗戰爭後贏回一場戰役，呢個結果對股市算係小小好消息，本地同英國關係密切嘅股份昨日都有唔錯反彈，特別係金融類股份。喺選出咗新領導人後，脫鈎震盪第一波正式完結，相關股票經過急勁嘅下滑後，未來將跟隨英國啟動脫鈎程序同談判波動。
有中環銀行家話，英國脫離歐盟，未來和歐盟的關係要重新談判，概念上必定會喪失單一市場待遇，從做生意角度肯定蝕底咗。現時紐約、新加坡及香港幾個英語金融中心，都諗緊點樣撬佢生意，銀行家就覺得紐約得益會最大，呢個亦解釋咗點解美股喺脫歐後可以創新高。
英鎊回勇，兌港元上番10.23，加上市場料日本將大手放水，日圓應聲走軟，每百日圓兌7.47港元，環球股市轉強下，恒指連升兩日，昨收報21224點，漲344點；國指收報8855點，揚152點，成交金額711億元。
港鐵地產廣告生意麻麻
賀英國女首相上場，匯控(005) 連同中移動(941) 及騰訊(700) 合共推動恒指升113點。匯控升1.68%；中移動漲2.71%；騰訊創新高，最高見過181.7元，收升0.5%至180.9元。領展(823) 及港鐵(066) 續破頂，領展高見56.2元，收市升3.4%至56.05元；港鐵高見41元，最終升1.24%至40.9元。
港鐵及領展屢創新高，有鍾意唱反調嘅中環茶友就懷疑呢個係咪理性嘅投資選擇。茶友話港鐵、領展雖然喺佢自己嘅領域有好強嘅經營優勢，但係大圍環境向下之際，唔通佢哋真係可以完全唔受影響？佢舉例港鐵都有自由行乘客，佢嘅廣告生意都有名牌，佢賣樓都受樓價疲弱影響噃，呢啲生意下滑之餘，派高息亦影響現金流，佢股價不斷攀升，係咁有啲唔合理呢？
睇番港鐵2015年總收入升3.8%至417億元，盤生意咁大，佢未計香港物業發展利潤、折舊、攤銷及每年非定額付款前的經營利潤上升4.5%至161.20億元，相當唔錯。股東應佔經常性淨利潤上升6.7%至85.65億元。除稅後物業發展利潤為23.29億元，主要來自「緻藍天」的利潤入帳和出售尚餘單位。
由於物業發展利潤減少，若不包括投資物業重估，港鐵股東應佔基本業務淨利潤其實減少咗5.9%至108.94億元，即每股盈利1.87元。初步睇佢基本溢利好大機會受經濟放緩影響下跌，地產收益就要睇佢賣樓數量增多少，可唔可以冚番樓價下跌嘅影響。現時佢市盈率超過18.4倍，經常性息率2.6厘，比公用股低啲，股價受追捧，我覺得係因為分兩年共派4.4元特別股息，加咗印象分。港鐵主席為求高鐵方案過關，諗出派特別息的呢條好橋，在好息的年代大受歡迎，不過搞到18.4倍市盈率咁高，就等如透支咗未來嘅升幅啦。
陸羽仁
金融High Tea 舊文
來源 source: http://hdfin.stheadline.com
