好消息 漸消化
2016年07月22日
港股跟隨美國再破頂，指數重上兩萬二，真係你唔信、佢又升。喺指數突破兩萬二後，基本上收復咗今年失地，有人睇圖仲計數，仲話有牛市誕生之象?。
金礦股率先回吐
恒指今個月由插穿兩萬點後起步，至今回升超過二千點，幅度超過一成，升勢又急又勁，而且
主要集中喺穩定收益的股份。部份大行開始有戒心；另一邊廂，由於指數升破咗之前嘅頂位，有人從走勢睇就認為牛市已經來臨，睇法相當分歧。
有茶友問點睇？我嘅答案係唔使咁極端，大行話股市潛藏危機，係咪咁無人知，但個市升咗咁多，累積調整壓力肯定愈嚟愈大。全球炒緊各國央行會放寬銀根，呢樣嘢對大部份國家嚟講無錯，但對美國就有小小唔同。美國六月份唔加息係想睇埋英國公投結果，最後真係爆咗黑天鵝出嚟，大家自然估聯邦儲備局會唔加息住，呢個想法本來好正路，但跟住過去個十幾日，美國公佈出嚟嘅經濟數據好靚仔，顯示經濟正在持續升溫，同埋股市債價屢創新高，形成資產波波吹到好大。用呢個角度去睇，息口嘅好消息已不斷反映同消化。
大行開始擔心資產汽球吹得大，摩根大通資產管理董事總經理Oksana Aronov就提醒投資者，家全球有很多債券根本無息收，唔少債券交易是基於有其他人接貨，呢個即係搵大儍遊戲，是幾危險的玩法。據佢嘅分析，在歐洲和日本實施負利率情況下，投資者在2016年大舉買入美國國債，但美債並非好似投資者認為咁係無風險投資。考慮到通脹因素，美國10年期國債實際孳息率也是負數，接近1980年以來最低水平，甚至低於同期日本國債的實際孳息率。
Aronov形容，債市存在史無前例風險的時候，因為看到如此巨量的資金流入，但以實際價值衡量，他們買的不是甚麼具有巨大價值的資產，所以佢勸高追美債嘅投資者要三思而後行。
美債呢排升到「嘭嘭聲」，最近呢個星期取得一年來最大漲幅，皆因美國經濟展現出強勢跡象。隨着經濟數據好轉，交易員們提高對聯儲局會今年加息的押注。期貨合約顯示，交易員們預計聯儲局會今年加息可能性47%，接近於英國6月23日舉行，退歐公投之前的水平，所以我話寬鬆政策嘅利好作用已不斷被消化。
另一個現象市場炒全球幣策趨鬆，令美元一枝獨秀，隔夜美匯指數再創4個月新高，加上避險降溫，終於觸發金價大跌!
上一日，期金急挫1%現價金昨早險守1310美元關，令一眾金礦股逆市受壓。招金(1818) 造8.55元，挫2.6%；紫金礦業(2899) 跌0.35%，造2.86元；中國黃金國際(2099) 瀉4.3%，造14.26元；SPDR金ETF(2840) 報977.5元，跌0.6%。
中廣核炒併購急升
陸羽仁唔係金甲蟲，對金價走勢沒有深入研究，但就留意到金價喺六月份已經起步，帶動金礦股明顯攀升，但呢排金礦股開始唔上，咁就要留意炒寬鬆幣策嘅第一浪開始接近尾聲嘞。
睇番個市，午後升幅一度擴大至236點報22118，但尾市都見有回落壓力，升勢大幅收窄，恒指收報22000點，升118點；國企指數收報9057點，上漲33點；成交653億元，可見低位買咗嘢嘅投資者都郁手食吓胡或者轉炒吓個股，好似維達(3331) 獲大行唱好，全日飆升9%，報14.58元；神華集團傳向中廣核集團提併購，中廣核旗下的本港上市的中廣核電力(1816) 即飆8.6%，收2.39元，跑贏一眾國企指數成份股。
陸羽仁
金融High Tea 舊文
來源 source: http://hdfin.stheadline.com
