中環在線：
百富攞獎CFO趕走分析員
■片中見到李書沸不停手指指，用英文發炮，趕一名西裝友離場。 
■嗰位分析員最終自己走出去。 一條30秒短片令百富環球（327）財務總裁（CFO
）李書沸（Chris）一炮成名！
噚日下午中環人瘋傳一條短片，片中見李書沸喺一個會議入面，不停手指指，用英文發炮，趕一名西裝友離場，係咁叫佢「out！」，甚至警告對方如果唔走，會叫人入嚟帶走佢，嗰個人最終自己走出去。
查實呢場係百富中期業績嘅投資者會議，被叫離場嘅係麥格理分析員Timothy Lam，佢今年4月出過一份報告，將百富環球評為「跑輸大市」，唔通呢個就係百富CFO趕佢走嘅原因？
唔係啩？李書沸剛於上月獲《機構投資者》雜誌，評為亞洲（日本除外）最佳首席財務總監（科技及硬件）第一名，百富亦獲評為亞洲最佳投資者關係（科技及硬件）第二名喎。但係，李書沸咁嘅表現，好似同呢兩個獎，有啲距離喎。
百富晚上就回應，指嗰位分析員冇獲邀請入場，所以公司堅決要求佢離開，又話今次係個別事件。
今時今日，有圖有片有真相，投資市場更講求資訊公平公開，普通人有言論自由，分析員亦有評級自由，咁你當然亦有趕人走嘅自由嘅，投資者會自己揀好股票囉。
睇番年報，李書沸今年39歲，澳洲臥龍崗與新南威爾斯大學畢業後，先後任職德勤與安永，再做過富通銀行與漢威資本，2011年加入百富至今，一條片令佢成為最爆CFO。
李華華
mailto:LiWaWa@AppleDaily.com
李華華
LiWaWa@AppleDaily.com
中環在線 - 李華華 舊文
來源 source: http://hk.apple.nextmedia.com
