魚樂無窮：尋找大劉概念股
■華置因出售皇室大廈派特別息3.23元，劉鑾雄（左）輕鬆袋走46億。 資料圖片
華人置業（127）宣佈，因出售皇室大廈派特別息3.23元，大股東大劉劉鑾雄輕鬆袋走46億銀，近10年華置變賣資產套現派息，大劉自己勁袋350億銀，肥過肥仔水，難怪本報記者以息魔形
容他時，他表示非常滿意。
日前，明輝國際（3828）就出售上環辦公室以及車位物業簽訂意向書，總值2.63億銀，相當於市值接近四成。
「喂！一來唔一定成事，二來冇人話會派番出來，點叫大劉概念股呀？」翻查資料，明輝2009年以1.3億銀買入物業，如果單刁搞掂，特殊收益好襟計（2013及14年盈利加埋只得1億銀，舊年因商譽減值見紅），賣產意慾甚大。明輝其中一位股東乃David Webb，佢揸住兩隻愛股愛高（328）及亞倫國際（684），今年不約而同因賣產豪派特別息，推測明輝照辦煮碗，絕非空口講白話。
再講，主打酒店供應品業務嘅明輝，舊年核心業務大賺8,000萬銀，全年照派息5仙，股息率近五厘，坐貨等好消息，大有機會財息兼收。目標價睇幾多？華置一個月升近倍，明輝打個折頭都好和味了。
唐牛
http://www.fb.com/tongcow88
本欄逢周二、四刊出
唐牛
魚樂無窮 - 唐牛 舊文
來源 source: http://hk.apple.nextmedia.com
