【不問價追】DBC的1000天（小炒王梁心欣）（第85期）
2016-8-14 18:00:15
「1000日」絕對無誇張，三年前，即係2013年嘅8月我正式在數碼港返DBC嘅財經台。如果有留意開我嘅人都知，2013年嘅年頭我已經轉咗做freelance，直至8月嘅時候，
受到大當家馮淑眉嘅邀請，我正式進入咗電台，即係DBC數碼電台。我除咗做過電視台的工作，我確實無返過電台工，只係以前曾經返過商台嘅《星火燎原》做客席主持。
返工第一日，我已經覺得好唔容易，嘩，一來數碼港相當之遙遠，二來係我從來未試過一條氣要講兩個半鐘頭！我即時諗起陳奕迅嗰首歌嗰一句歌詞「喉嚨痛得要死……」喂，你會話，唔係喎，以前你在電視台都係一連講三個鐘㗎啦，咁電台有咩分別呀？電台你係冇得偷懶，1秒鐘嘅deadair都唔可以有!呢個係我自己畀自己嘅目標，你飲水、睇手機都會令到人哋以為你消失咗，電台唔同電視台，電視台用畫面分散你的注意力、用嘉賓嘅靚樣分散你注意力，所以入電台係一個新挑戰。
可能係我天生鍾意講嘢，第一個星期左右，我已經開始習慣唔唞氣一連氣咁講落去，我好多謝當時願意來數碼港同我做節目嘅嘉賓，因為佢哋在中環、上環、銅鑼灣過嚟都係非常之塞車，仲要係開市嘅時間，所以我對佢哋絕對有份尊敬。好多人話喺數碼港返工有個優勢，得閒去草地度瞓下囉，之後又可以好悠閒咁行下。Sorry，我從來都一收工就出咗去，同人食飯啦、應酬啦、睇住個市，所以我都係放假先至享受到數碼港嘅優點。直接搬去灣仔嘅電訊大廈嗰刻，我係非常之興奮。因為我哋嘅設備真係非常之完善，靚房靚咪，過多半年仲幫我哋做咗套電視嘅系統，只要你打開個Apps，就可以聽到聲、睇到畫面，其實我覺得個投資係相當自大。
DBC畀我嘅創作空間相當之大，每個朝頭早都係我自己準備嚟緊三個鐘節目嘅資料，其實都可以咁講，係「任我講嘢」。你諗下公司對我的信任度好高，所有嘅鋪排，所有講嘅冧巴，正常都要得到公司嘅允許，呢度就唔需要，其中，《小炒王國》係我最喜歡的節目。
起初，《小炒王國》唔係一個定期節目，係我有心水冧巴先至會推。因為我覺得如果將個節目定性為一個定期節目，即係每日要我提供一個冧巴，其實係有難度，因為我唔係一個為推冧巴而推嘅人，所以開頭係不常規嘅一個節目，做咗無耐，大當家話：「不如你日日做啦，因為睇收聽率，真係非常之受歡迎。」
每日做都是我嘅壓力來源，直至我見到開始多人睇多人開始聽，我就好認真，在九點半之前就會諗定一個冧巴，咁當然都試過市況唔好，我係冇推冧巴，順便講下啲投資心理，同大家分享一啲投資嘅心態，自由度的優點令我真係好鍾意《小炒王國》呢個節目。
就算連請嘉賓，監製建議我搵返同我夾嘅嘉賓一齊喺節目度吹水，我諗當時我做主持都做到一個受尊重嘅地步，所以DBC呢三年，我同所有嘅同事都相處得非常之愉快。我諗唔到有咩公司會為咗世界盃跳一場大形舞蹈，同其他台的主持會透過公司活動而熟絡，甚至在走廊行開行埋都會大家笑笑口、傾嚇偈咁，呢一個係我對DBC最唔捨得嘅地方。
開頭啲人擔心我去咗個人氣唔夠嘅地方，會唔會令自己少咗幕前的機會，答案係否定的。我透過《贏盡全場》同埋《小炒王國》呢兩個節目認識到更加多鍾意投資嘅朋友，更加開心係，喺Facebook嗰度佢哋都會同我講，希望將來在另一平台再見到小炒王。有乜嘢新方向？甚至會唔會繼續落去呀，小炒王暫時都未有定案，不過一個咁鍾意講嘢嘅人，我都相信我會繼續落去。
講得難聽啲，唔講嘢我都差唔多會死，所以好慶幸有一份工畀我寓工作於娛樂，可以自己玩啦，同人哋交流啦，講真，好細個時候我嘅志願係做一個DJ，因為我覺得我可以透過聲音同人哋溝通係我最大嘅優勢，結果我如願以償。在此我好多謝大佬羅燦、Mable、添哥、馬Sir、火燎森、棋亮、朗唯、Joe Lee、陳承龍、Sky sir、George、珠珠、Ryan、Ben、Ken、珊珊、Toy、Nicole、至君、小米、雪雪、一眾P.A、幕後同事（排名不分先後）。
後會有期、江湖再見。
不問價追 - 小炒王梁心欣 舊文
來源 source: http://www.winmoney.hk
