智取大市：業績癲就陪佢癲
■趙桂斌（中）任主席的耐世特單日升三成，證明波幅大可小注吸納。 資料圖片
如單睇騰訊（700）同舜宇（2382）業績後爆升，定以為炒業績好過癮，實情唔少股份業績玩法刁到龍門任擺，吉利（175）噚日中午公佈業績，午後一開市升咗5分鐘，再一度倒插8%。信利（732
）績後跌6%再倒升3%。同一隻股，同一份業績，想演繹成升定跌都得，因為一隻累積升幅多嘅股，業績靚仔，可以話好消息出貨，於是業績後先升後急插；業績倒退的話又可以話利好因素未反映，於是先急插後倒升。
以下例子唔知係危定係機，但小弟認為值得小注一試。本身條街唔多貨嘅耐世特（1316），周三收市後公佈半年收入升17%，純利升54%，每股盈利6美仙，粗略年度化嘅全年每股盈利93.6港仙，按周三收市價7.7元計，市盈率僅8.2倍，靚業績足以令股價周四開市裂口高開三成，然後開市頭5分鐘引來龐大沽盤質低超過一成，持貨者喪沽食糊連嘴都唔抹，好合理啫！
其後竟逐步有資金買上，收市有本事去番接近開市價，上車客不問價買，買需抵銷喪沽食糊客。就當升番去年度化市盈率15倍，都係14蚊，達標似乎都唔難。有本事單日升三成證明波幅大，故只建議小注吸納。
晉佳
http://www.fb.com/advanceguy1
本欄逢周一、三、五刊出
晉佳
智取大市 - 晉佳 舊文
來源 source: http://hk.apple.nextmedia.com
