國泰航空怕未衰完
2016年08月19日
美國聯邦儲備局嘅會議記錄聲氣偏鴿，雖然唔能夠排除加息機會，但就令市場相信9月份郁手嘅機會唔大，美股跌後反彈微升。港股跟隨彈升，最高升近400點。恒生指數收報23023點，升223點，國企指數收報9654點，升12點，成交去到930億元。
盈富發揮霰彈槍效果
大市向好，重上兩萬三千點，同騰訊(700) 大升5%有關，呢隻科技股王爆上10元，破關收報203元。騰訊業績畀大行讚好過預期，但咁高位真係好「蝦」人買，尤其老散仲有幾多個敢落注呢？中環茶友笑言，佢入咗少少盈富基金(2800) ，都有小小得益於騰訊，算係跌咗西瓜執番粒芝麻。睇番盈富基金交投緊隨騰訊後排第二，證明除咗有大戶當買指數對冲，都有人鍾意佢嘅霰彈槍效果，喺O依家板塊升幅唔平均下，買盈富幾啱用，唔中多，點都中少少。
大市再向高位邁進，但幾隻公佈業績嘅股份就中槍倒地，吉利(175) 半年純利19.07億元人民幣，按年升35.7%，但大摩指毛利率令人失望，吉利午後一度創上市新高後轉跌，曾高見5.93元，收挫5%造5.55元；其他汽車股亦捱沽，長城汽車(2333) 挫3.1%造7.82元；東風(489) 跌1.1%造8.97元；廣汽(2238) 下滑1.3%造10.6元；華晨(1114) 跌1.02%造8.78元。
好似吉利公佈靚業績後回落，好明顯係有胡先食心態，畢竟佢累升唔少，由2月低位2.76元，升到昨日高位5.93元，累升115%，嚟緊生意要繼續喺高位運行，先能帶動佢股價再上，形勢未確定前，投資者賺咗先點都無錯。
吉利股價升得多會插，升得少的股份一樣插，國泰航空(293) 同太古系派成績表，結果連埋太古地產(1972) 三間公司一齊被人插低！太古A(019) 收報89.4元，跌1.8元，跌2%；太地收21.6元，跌0.4元，亦跌2%；最傷係國泰，插到11.34元，無咗0.58元，唔見咗4.9%市值。
國泰績差事前無盈警
國泰宣佈中期業績，純利倒退82%，賺3.4億元，其中國泰本身業績見紅，靠國航盈利入帳，先至幸保不失。大和證券喺公佈後就調低咗國泰盈利預測。
去年國泰盈利衝上高峰，好多人無諗過今年跌剩一成幾，有記者問管理層點解唔盈警，呢個問題可能講出咗好多一般小股東的心聲。管理層解釋係公司個個月都發數據，投資者應該心中有數。
坦白講，陸羽仁對於國泰無發盈警都有啲意外。去年我對佢業績比較睇好，踏入今年就有啲唔樂觀，主要係本地商業景氣轉弱，最好利錢嘅頭等同商務客位生意下降，令佢利錢大減。後來公司宣佈凍結非緊急嘅招聘，進一步印證咗佢生意麻麻，所以喺最近一個月業績公佈前仲未出盈警，心中暗忖唔通自己睇漏咗嘢？不過睇佢股價走勢，就一直維持弱勢，唔似跌眼鏡。
昨日佢喺升市下仲插得咁急，或者同期望管理有小小關係。老實講，一般人未必識用公司嘅數據，化作未來利潤預測，而且佢盤生意咁大，除咗營運數字，成本、匯率以至其他業務，普通投資者無得做公司訪問，好難自己靠估，見你盈警都無發就跌八成幾盈利，真係怕你未來唔聲唔聲又嚟多鑊喎。
上半年業績已經過去，跟住就睇下半年。太古系地產比較穩定，雖然商場受自由行豪客減少打擊，其他瓣數應該OK，反而國泰睇嚟會煩啲。
國泰通常下半年有暑假同聖誕兩個旺季，生意會大好。不過，佢現價唔係咁平，歷史市盈率7.4倍，上半年賺3.4億，全年即使賺20億，都有22.3倍市盈率，如果唔過呢個數，股價仲係貴。陸羽仁覺得，國泰面對嘅不利因素，除咗本地經濟放慢嘅大環境，美元弱地油價難大跌，更加重要係競爭多咗，令佢應付遷境嘅主動性低咗好多，喺航空業競爭穩定下來之前，真係唔敢太早入貨。
陸羽仁
金融High Tea 舊文
來源 source: http://hdfin.stheadline.com
