膽汁少難追科技股
2016年08月17日
港股經歷八連升後，好淡角力加劇，最終微跌21點收市，終止咗多日升市。內地股市乏力低收0.5%，影響咗中資概念股嘅力度，大巿靠科技股支撐，自然有啲吃力。收市後國家總理李克強透露，國務院已批准《深港通實施方案》，O依家睇吓對後市有幾大威力嘞。
昨日黃昏時深港通公佈後，期指升170點左右，衝近23100點，若今日上埋23000點，就唔好期望太高啦。
而昨日個市部份科技股發威，都頂唔到大市升勢，結果恒生指數收市報22910點，跌21點，國企指數收9707點，跌不足1點，成交842億。
港股升上兩萬三，其實已經好好嘢，因為個市唔係有乜板塊可以發威做火車頭，再者亦見唔到好多新錢入市。呢一浸大市升上兩萬三，先前發力嘅高息股同房託都唞晒大氣，部份出現回吐，反映資金都係換下馬，流入的新錢唔多。喺注碼有限下，大市主要係輪流炒，雖然指數OK，但股份有上有落，唔係咁易扑中那些上升股份。
又到舜宇光學爆升
揀股難落手，其中一樣係經濟麻麻，普通股份唔敢買，好股又驚太貴買唔落手，好似昨日個市都係靠騰訊(700) 、舜宇光學(2382) 撐起，呢兩隻股同啱啱成為恒指新貴嘅瑞聲科技(2018) ，過去一年升幅都好驚人。
舜宇主要做鏡頭，剛公佈嘅中期業績純利大漲51%，扣除特殊盈利都多賺40%，大行好似野村都讚佢業績對辦，股價高處未算高，昨日再創新高，收報37.9元，升13.5%，以幾百億市值嘅公司咁升法都好誇張。睇番期內佢股價由今年1月16元低位起步，升到O依家差不多飊升咗137%，市值超過416億，市盈率去到44.8倍。以佢嘅估值，相信貨源已經大部份落入基金手，普通散戶已經好難沾手。
手機股無論軟件硬件都係高速發展產業，成功者可以迅速累積大量財富，當然過程會遇到唔少門檻，唔係咁易跨過瓶頸。好似另一隻硬件股通達(698) ，近幾年投入做機殼，股價上升一段時間，但因為技術含量唔夠高，股價升至1.7元樓上就遇到好大阻力無法再突破，昨日大幅回吐4.7%，收1.63元。公司管理層最近拍晒心口話未來兩、三年繼續有增長之餘，仲透露考慮研發加入3D玻璃生產機殼，呢個嘗試未知能否成功。睇番通達投資做機殼，雖然無舜宇孖寶咁發，但市值都升到93億元，市盈率12.3倍，老闆食髓知味，希望舔多一舖。
新經濟可以小本食大茶飯，舊經濟就要靠本大賺微啲搵食。近排本港地價回勇，主要係多咗內房商嚟香港搵食，低價好難偷雞買到地。
雅居樂加入地王潮股價跌
中環茶友講起，內房商嚟香港咁勇，主要係佢哋覺得呢個新巿場易做過大陸。內地最近出現地王潮，不同城市賣地價都飆升，於是內房商唯有鬥勇搶地。最新雅居樂(3383) 就用21億投咗塊廣州地皮，每平方呎近3300元人仔，成為單價地王。投到地王，雅居樂收報4.88元，跌0.8%。
內地分析家認為地王潮湧現，同內地土地供應開始緊張有關，特別係北京、上海、廣州、深圳呢啲一線城市，不再有太多新地皮推出。從過去經驗，地王潮往往同樓價見頂同步出現。O依家內地地王不斷挑戰新高價，有可能令中央進一步收緊樓市，咁對內房股會加重咗壓力，同一時間，內房商有可能繼續殺落香港搶貴地皮，咁就對樓價有利，但對地產股就未必着數。
陸羽仁
金融High Tea 舊文
來源 source: http://hdfin.stheadline.com
