智取大市：超買仍可買的股
■長遠而言，吉利係逢低吸納之選。 資料圖片
星期二幾乎收復星期一嘅失地，但後市仍要有chok嘅心理準備，建議以明顯跌穿星期一低位作為止蝕，藍籌股繼續坐住先。
以月線圖睇，9月暫時喺高位呈現一支十字星，即係話，方向仲未明朗。咁10月點呢，回顧金融海嘯過後，連續
七年嘅10月份都錄得上升，當然唔代表恒指嚟緊10月一定會重覆過往七年趨勢咁樣升，不過至少反映10月份係近年港股旺季，只要冇乜壞消息，投資者風險胃納猶在嘅話，短線方向應該向上，然後再以技術指標超買訊號設定為出貨時機。止蝕、目標準備好，餘下時間且戰且走。
跌完又彈番轉頭，咁乜嘢二、三線股最強？冇調整過嘅吉利（175），單日急彈3.7%，根本冇跌過。
本欄8月初推介吉利，當時5蚊邊，𠵱家講緊7蚊邊，由投資好選擇，變咗半投資、半投機嘅選擇，不過，亦可以話確認原先想法正確。樓上冇乜蟹貨之下，高追冇話唔啱。之前講過佢最大亮點係電動車業務，售價廿幾萬人民幣嘅純電動車帝豪EV，相信已佔銷售額達8%，長遠繼續推電動車新款，銷售電動車比例繼續提高，朝向半增長股進發，升都仲有空間，長遠更加係逢低吸之選。
晉佳
http://www.fb.com/advanceguy1
本欄逢周一、三、五刊出
晉佳
智取大市 - 晉佳 舊文
來源 source: http://hk.apple.nextmedia.com
