中環在線：「always agree with your boss」
樓神借財爺金句贈股東
■樓神趙國雄賣口乖，話聽曬股東話喎。
「超人」李嘉誠旗下泓富產業信託（808）近排有單收購遇上阻滯，將要召開股東特別大會，畀股東表決繼續收購定係取消交易。長實樓神兼泓富主席趙國雄噚日賣曬口乖
咁話「股東就係我哋波士」，然後借用財爺曾俊華最新金句「You always agree with your boss」去回應事件，認真鬼馬。
19億買物業惹爭議
事緣泓富最近宣佈，計劃以接近19億元買起觀塘觀點中心全幢物業，不過部份股東唔贊成管理層呢個決定。
趙國雄承認，泓富股東對於收購嘅睇法未必同管理層一樣，好似擔心續約問題、投資回報等，所以要經過股東特別大會投票，由股東表決到底仲買唔買，佢笑住話，「You always agree with your boss. No question about that.」呢句說話，正正係財爺上星期出席橫洲事件記者會，回應傳媒問佢同梁振英有冇唱反調嘅神級金句。
至於市傳長實地產（1113）有份投資嘅基金，有興趣買入長實旗下中環中心權益，畀市場覺得咁樣做，只係左手賣畀右手。趙國雄回應話，大家每個禮拜都聽到中環中心要賣嘅消息，冇辨法逐個回應，而且對股價太過對敏感，所以唔講，到落實成交再公佈喎。
李華華
mailto:LiWaWa@AppleDaily.com
李華華
LiWaWa@AppleDaily.com
中環在線 - 李華華 舊文
來源 source: http://hk.apple.nextmedia.com
