財經評論 2016年9月29日

財經評論 2016年9月29日

財經評論：
阿爺打造樓價高牆


■內地樓價變了不能倒的高牆，是政府一手打造而成的。　資料圖片

同朋友傾內地樓價，內地政府好似頻頻出招，由3月開始放風要打擊首付貸、重出限購限貸等，計落至今有12個地方分別出招。但深圳呢啲一線城市，樓價按年升四成，即使3月起計都升兩成，升勢難停，連官媒都開聲話地方做唔到嘢。

但唔做嘢，同做唔到嘢係兩回事。地方政府無心做嘢，一來供地不足，隨手去深圳市政府睇以往供地及舊改資料，就知道關內無論正常招拍掛，還是舊改住宅地，都極為稀有。而大陸人無咩多，錢多人儍聞名天下，買不到關內地，咪向關外發展囉。咁樓市幾時停？朋友反問：「好難停，點停？」

因為遠到阿媽都唔認得嘅「一小時生活圈」，長草、爛地、靠工廠支持經濟的惠州、東莞等等都「樓價升了一倍，最差都升一半，咁關內嘅點停？」

近來朋友勸我到深圳走動，去睇嚇好旺的深圳龍華、坪山、龍崗、光明，終於去到真係覺得幾好，市中心盤有曬地鐵、生活配套，但與同行的朋友去大陸貢茶飲一杯，結果貴過香港兩成。但當地有咩產業可支持咁高消費？無，隨手係街到捉當地人問，都是工廠打工仔，後生仔搵幾多使幾多，一係拆遷戶，暴發起來，其他都是外來人。

樓價升的元凶係邊個，好明顯啦。當初阿爺開宗明義新經濟未得，舊經濟撐住先，先搞到今時今日咁。今時今日再派官媒出嚟澄清話房地產唔係一個國家的核心競爭力，搵鬼信。樓價大而不能倒的高牆，係政府一手打造出嘅。

記者：方楚茵

財經評論 舊文

來源 source: http://hk.apple.nextmedia.com