人仔腳軟股市承壓
2016年10月12日
重陽節期間，中美股市造好，港股股民預期恒指應該高開，24000點破關可期，結果期指真係高開，好快升過200幾點，升上24064點高位，但跟住就沽壓湧現，最低下插300幾點，高低波幅623點，最後跌302點散場，成為高追的好友陷阱。
港股喺外圍唔差下反插，市場有個講法係
話再發現有歐洲銀行財政出現危機。不過，我認為呢個講法說服力唔大，因為差不多一開市就見左高位然後急回，唔係等到歐洲開市才跌。技術因素係24000點沽壓好大，甚至有淡友夾上引散戶落疊然後追沽。
如果睇基本面，更大的跌因係人民幣貶值壓力加大，個市O依家向下炒美國12月份可能加息嘅因素。過往每逢美元強，日圓弱，日股就有得升，但人民幣弱，港股就會添壓。
600點波幅成好友陷阱
睇番人仔走勢，據中國外匯交易中心數字顯示，人民幣兌美元即期續挫120點子，收報6.7148兌1美元，與中間價再貶值90點子，雙雙續創逾6年新低。離岸人民幣則較在岸收市價低51點子。
交易員話，昨日中間價調整確立新一輪跌勢開始，期間未見明顯大行維穩；短期匯價跌勢或延續，惟跌速可能放緩。
有中環茶友認為，呢排內地人好多都講緊點調錢出外地，皆因大家都預期人仔會貶值，有機會都想擰錢走。上星期內地公佈的外儲數字跌到落低位，雖然中央話咁係藏匯於民，實際外匯減少令人關注。
內地走資令匯價受壓，理論上資金尋求保值，有可能流入等同美金嘅港元資產，不過短期而言，人仔貶值會令內地經濟帶來不穩定，而且港股中有唔少中資股資產喺內地，若然人仔匯價調得急同幅度大，佢哋盈利換成港元都要按比例下調，對港股就會有即時壓力。
同匯價有關嘅係，外資對內地嘅經濟狀況一度稍為放心，但最近對內地債務急增同樓市猛升好關注。為左控制樓市，中央同地方不斷出招，除左加大限購，外電引述消息報道，人民銀行、中銀監及中證監等金融監管部門，計劃收緊對房產及土地買賣市場的投機資金限制。
O依家係金九銀十的賣樓高峰期，本來係炒作內房股嘅時節，但今年內地唔係擔心賣樓太慢，而係擔心賣樓太快增加左阿爺收緊力度，喺市場焦點轉移下，內房股變左跌市嘅重災板塊。內房股喺跌市沽壓重，中國海外(688) 跌4.2%造24元；華潤置地(1109) 挫3.9%，造19.42元；萬科(2202) 下滑3.3%，造19.22元；深圳控股(604) 挫5.5%。
領導人訪澳無話挺賭業
由於房地產同銀行息息相關，內地金融股都乏力，建行(939) 跌2.4%，報5.78元；國壽(2628) 跌2.3%，報21元，係跌幅比較大嘅中資金融股。
國務院總理李克強到澳門考察三天，推出19項優惠澳門經濟多元化政策，德銀發表報告認為，此行顯示中央調整對澳門政策，將推出更多支持措施，建議投資者趁機低吸濠賭股，籲「買入」金沙中國(1928) 、美高梅中國(2282) 及新濠博亞。
睇番李克強提出嘅支持措施，包括支持澳門建設世界旅遊優閒中心、中國與葡語國家商貿合作服務平台，冀澳門適度多元化發展。領導人呢啲方案，都係叫澳門做多啲其他嘢，唔係叫佢大搞賭業喎，所以德銀話澳門博彩業正迎來增長周期的起點，現價相當預測明年企業價值對EBITDA的13.5倍、市盈率22.6倍，高於綜合歷史均值，但盈利前景改善，估值仍然合理，呢個係佢嘅意見，從領導人之行就睇唔到有鼓勵博彩業嘅訊息啦。
陸羽仁
金融High Tea 舊文
來源 source: http://hdfin.stheadline.com
