接平貨要識計數
2016年10月27日
美國大公司宣佈業績未有大驚喜，外圍缺乏氣氛，加上美國十二月份加息機會估計接近七成，美匯呈強，港股壓力未消。
喺咁環境下，今個星期破咗底嘅大股郵儲銀行(1658) 再創新低。呢隻股長和集團(001) 主席李嘉誠都有買咗佢嘅衍生工具，佢咁跌法，有人問咁幾時可以跟呢？有中
環茶友話，李超人用衍生工具持有郵儲銀行，呢類產品多數係用錢買咗啲票據收息先，若然到時跌到接貨價就要收股，有關公佈無講個產品結構係點，所以大家唔知李超人會喺幾錢接貨，想跟都唔知喺乜價位跟。
試估李超人幾錢接郵儲行
茶友話，掛鈎衍生產品一般係接貨價愈高，收到嘅息愈高，好似郵儲銀行本身係高息招徠，要做佢嘅掛鈎票據唔係真係貪佢高息，而係希望可以低價先接貨，所以佢估李超人如果係買呢類產品，佢接貨價可能定得比較低，有可能超過一成，甚至兩成。郵儲銀行上市價係4.76元，若然接貨價係九折，咁就係4.28元，同昨日收市價4.36元仲有啲距離。大行瑞信日前出咗報告，預計郵儲行明年市帳率達0.88倍，比四大行的0.66至0.92倍屬第二高，加上市盈率達8.4倍為業內最高，因此判斷其估值偏貴。若然係按瑞信給目標價3.5元，折合預期0.67倍市帳率，呢個價等如係招股價嘅七四折。
如果話郵儲銀行要跌到去0.67倍市帳率，等如係上市大型內銀股最低市帳率嘅範圍，呢個估值就兇狠啲，但如果話大戶買衍生工具接貨價低過上市價兩成，亦都無話唔可能。茶友嘅估計未必係真正答案，但如果想跟大戶入貨，買到真正大件夾抵食嘅平嘢，幾多錢至諗得過呢？呢個分析就可能畀到一個估值嘅參考，要跟嘅話一個穩陣方法係用呢啲指標分段入貨，而且將買貨比重放多啲喺後尾。
講開李超人，佢真係百億大刁常時有，長實地產(1113) 公佈，連同李嘉誠海外基金會旗下的全資附屬公司，以200億元人民幣出售持有上海市浦東新區由和黃地產陸家嘴「世紀匯廣場」的物業發展項目。
美匯強無礙金價升
呢個物業用作商業、辦公、文化及其他綜合用途，並已竣工，目前正在進行裝修。長實地產單係呢個項目，預期會錄得約62.2億元未經審核得益。
其實，昨日弱弱哋嘅大股點止一隻郵儲行，連呢排生意好多嘅友邦(1299) 都走低1.32%造52.3元，重磅股騰訊(700) 跌1.21%造212.2元，結果恒指收報23325點，下挫239點；國企指數收報9698點，下滑138點。升得多嘅汽車板塊基本捱沽，吉利汽車(175) 挫3.2%造8.8元，廣汽(2238) 降3.09%造10.66元。
長城汽車(2333) 公佈截至9月底止首三季業績，純利72.09億元人民幣，按年僅升16%，成績表被大行指為失望，股價大跌11.46%造8.11元。
美匯雖然強勢，仍無阻金價回升，重上1270美元之上，令金礦股有力逆市升，市傳紫金(2899) 有意購阿根廷金礦股權，股價漲3.3%造2.5元；招金(1818) 升3.87%造7.78元，SPDR金ETF(2840) 漲0.59%造944元。
陸羽仁
金融High Tea 舊文
來源 source: http://hdfin.stheadline.com
