亮說亮話：唔做熟客生意？
■政府早前宣佈將第二間住宅的雙倍印花稅全面提高至15%。 資料圖片
在政府推出新印花稅當晚，我去了一間經常爆棚的食肆食晚飯，經理叫我盡量叫餸，因為從半夜開始，所有曾經幫襯過的客人都要加收15%附加費，新客豁免。雖然這種手法亦不是新鮮事，信用卡公司亦豁免新
客戶年費，舊客戶在沒有欠款的情況下，是可以申請豁免，批准的成數亦相當高；但食肆咁樣對客人，我是第一次聽到，究竟是甚麼原因，真的耐人尋味。
食肆經理同我講，他們收到消息，將會得到米芝蓮星，老闆知道將會有很多人慕名而來。為了不令那些人失望，唯有制定規矩，甚至犧牲經常來幫襯的人，最好辦法就是寓禁於徵，收取熟客15%附加費，相信有很多熟客不會介意。結果食肆不但可以多賺，又可以作出推廣，何樂而不為？我話千祈唔好。經理就話老闆參考政府的新印花稅法例，覺得非常適合用於他們的食肆。但如果老闆決定這樣做就大鑊，結果是得失舊客，新客又唔嚟，以後的生意就難做。
他們不明白消費者的心態，那些慕名而來的人，如果要等位一至兩小時，他們會認為值得，但如果可以直行直入，不用等位，他們反而會覺得不值。甚至認為米芝蓮評級機構亦不會幫襯，老闆想推廣就變成趕客。我同經理講，咁蠢的事只有官員可以做得出，參考他們的做法，就即是自己跳入火坑，經理話唔信，拭目以待。
湯文亮
mailto:jacinto.tong@gmail.com
本欄逢周二刊出
湯文亮
jacinto.tong@gmail.com
亮說亮話 - 湯文亮 舊文
來源 source: http://hk.apple.nextmedia.com
