女神tea time：IGG股價未GG！
■IGG首席營運官許元向傳媒勁有信心地講，「以現時的遊戲組合，公司今年及明年的業績增長沒有壓力」。 資料圖片
特朗普勝出大選，一大隻黑天鵝令個市震咗一陣子。最慘係騰訊（700），個個話特朗普唔關心科技，又限制移民，會累死科網
股，於是令條街嘅錢由新經濟搬去舊經濟。
即係咁，首先大家要知道，特朗普額頭刻住「走數」呢兩個字，當日夠話起圍牆啦，現時又話「其實起圍欄都OK。」之前夠狂數奧巴馬醫保改革，話要全盤推倒，最後就話最少保留兩項條款。所以政客嘅嘢，特別係生意人出身嘅政客言論，認真便輸了。所以，之前「特朗普受累板塊」之一科網股，唔使睇咁淡。
大家有睇騰訊業績都知，其實手機遊戲業務唔差，收入增長87%，主要受遊戲數量的增加，以及遊戲經營表現帶動。證明內地手遊業務其實係有睇頭，既然係咁，大家應該望望IGG（799）。IGG有97%收入來自手遊，3月推出《王國紀元》，只係推出半年，每月平均收入200至300萬美元，ARPU有4蚊美金，比起主要收入來源《城堡爭霸》嘅1蚊更高。
公司首席營運官許元接受傳媒訪問時，更勁有信心地講，「以現時的遊戲組合，公司今年及明年的業績增長沒有壓力。」事實上，公司上半年公司收入升21.4%至12.6億美元，管理層預期全年收入可達2.7億美元，如達標即係大升三成半。口裏點講都好，身體係最誠實，公司近期積極回購，而且越回購，個價就越高，一來對股價有支持，二來係表示公司有信心。適逢俾特朗普震一震落嚟，帶來一個低吸收集時機。
現正招股嘅建築股愛得威（6189）周五截飛，之前勁多建築細價殼炒完即散，大家聽到建築呢兩隻字都嚇走。不過睇返愛得威招股價5.16元至6.3元，仲要計收入嚟講喺全國排名18位，為中國前20強綜合建築裝飾服務供應商之一，睇落又唔似之前嘅殼仔。
Fifi
http://fb.com/lovefrystock
本欄逢周五刊出
Fifi
女神tea time - Fifi 舊文
來源 source: http://hk.apple.nextmedia.com
